1703 оной январиин 13-да I Пётрой зарлигаар «Ведомости» гэһэн Россиин һониной түрүүшын дугаар гараһан. Тэрэ гэһээр Россиин хэблэлэй үдэр тэмдэглэгдэдэг болоһон шуу. Энэ һайндэрөөр дашарамдуулан, СССР-эй ба РФ-гэй Сурбалжалагшадай холбооной гэшүүн, «Агинская правда» һониной сурбалжалагша Арсалан Добчиновтай хөөрэлдөө эмхидхээбди.
- Арсалан Бороевич, та сурбалжалагшын ажал хэзээ эхилээбта?
- Һургуулиин байхадаа, «Пионерская правда», «Комсомолец Забайкалья» г.м. газетэнүүдтэ материалнуудаа эльгээдэг һэнби. 1985 ондо Шэтын багшанарай дээдэ һургуулиин гурбадахи курсын оюутан ябахадаа, «Агын правдын» бэшэгүүдэй таһагта түрүүшынхеэ ерээб. Тэрэ үедэ ахамад редактораар - Ц.Г.Гонгоров, харюусалгата секретаряар Дашинима Амаголонов хүдэлжэ байгаа. Түрүүшымни мэдээсэл Дулдаргын аймагай Шандали нютагай таряа хуряалга тухай байгаа. «На камнях растёт хлеб» гэһэн хорин хуудаһатай мэдээсэлыемни 90 мүр болотор богони болгоод гаргаа бэлэй, тэрэ материал архивтамни бии. Энэ мэргэжэлдэ гушаад жэл хүдэлжэ байнаб. 1990 ондо Агын тойрогой типографиин директорээр томилогдооб. Долоон жэл болоод, Б.Б.Жамсуевай түрүүшын пресс-секретаряар, туһалагшаар ажаллааб. Удаань «Единая Россия» партиин Агын региональна таһагай исполкомой хүтэлбэрилэгшэ болоһон байнаб. 2012 ондо һөөргөө редакцияа ерэжэ, мүнөө болотор ажалланаб.
- Танай түрэлхид соо бэшэдэг хүн байһан гү?
- Абымни талаар зохёохы шадабаритайшуул олон байһан. Нэрлэбэл, хүгшэн абамни лама байһан. Бамбал Базаров абгамни шүлэг зохёохо дуратай һэн. Тэрэ Арсалан Жамбалонтой нэгэ курсда һураһан шуу. Би тэрэниие һажаажа, бэшэхэ талаан бэлигтэйб гэжэ һанадагби. 1941 ондо Москва хото шадар тулалдаанда наһа бараһан. Уваровка хүдөө һууринда дурасхаалай хүшөөдэ тэрэнэй нэрэ һиилээтэй бшуу. Эмшэн Баир Базаров дүүнь тиишээ ошожо, нютагайнь шорой абаашаһан. Балданов Доржи ахай бэрхэ зурааша, чеканщик юм. Буряад номуудта зурагуудые зурадаг. Улаан-Үдын оперно театрай хажууда байдаг «Мать-Бурятия» скульптурын соавтор. Абын аха Ойдоп ахай бэрхэ модошо дархан, мүнөө мэндэ, 88 наһатай юм.
- Танай һанамжаар, сурбалжалагша ямар байха ёһотойб?
- Нэн түрүүн, хёрхо нюдэтэй, ямар нэгэн хэрэг задалан шэнжэлхэ, хэлэндэ, бэшэгтэ бэрхэ байха хэрэгтэй. Мэдэсэнь үргэн байха ёһотой.
Дэлгэрэнгыгээр 1-2-дохи дугаарта.
