Дуугаа үгэлгын бюллетень соо «Вы одобряете изменения в Конституцию Российской Федерации?» гэһэн нэгэл асуудал байха. Тэрээндэнь «Да», али гэбэл «Нет» гэһэн харюу үгтэхэ ёһотой. Ямар һэлгэлтэ заһабаринууд оруулагдааб гэжэ бюллетень дээрэ байхагүй.
Бүхыдөө 37 шэглэлээр 400-гаад заһабари оруулагдажа байна.
Тусхайлхада, Россиин хуулинуудые уласхоорондын хуулинуудай хажууда шиидхэхы хүсэтэй болгохо талаар заһабаринууд хэгдэнэ, Гүрэнэй Зүблэлэй үүргэнүүд тодорхойлогдоно, Гүрэнэй Дүүмын, Федерациин Зүблэлэй, Конституционно Сүүдэй шиидхэхэ асуудалнууд үргэдхэгдэнэ г.м.
Жэшээнь, 69-дэхи статья руу гүрэн Ород Уласай арад бүхэнэй онсо өөрын шанар хамгаалха, хэлэ болон соёлыень зандань үлөөхэ асуудал бэе дээрээ даажа абаха тухай һэлгэлтэ оруулагдахань; 81-дэхи статья руу хэгдэжэ байһан заһабариин ёһоор, юрэнхылэгшэ хоёр болзорһоо удаан энэ тушаал эзэлхэгүй, 25 жэлэй туршада Ород Уласта таһалгаряагүй ажаһууһан эрхэтэн гүрэниие толгойлхо ёһотой; 131, 132-дохи статьянууд руу нютагаа өөһэдөө хүтэлбэриин зургаанууд тухай заһабаринууд хэгдэхэ. Үндэһэн Хуулиин хэдэн статья руу гүрэнэй дээдэ тушаалтанай боломжонуудые хизаарлаһан заһабаринууд оруулагдана. Тиигэжэ хари гүрэнэй эрхэтэн болохогүй, хари гүрэнэй банкнуудта мүнгөө хадагалхагүй - иимэ хизаарлалга президентдэ, сенаторнуудта, Гүрэнэй Дүүмын депутадуудта, гүрэнэй правительствын түрүүлэгшэдэ, тэрэнэй орлогшонорто, сайдууд-та, федеральна зургаануудай хүтэлбэрилэгшэдтэ, губернаторнуудта, судьянарта, прокурорнуудта хабаатай.
