Голдо загаhа барихада, амархада аятайшье hаа, аюултай байдагынь мэдээжэ. Россиин МЧС-эй ГИМС-эй Агын тойрогой патрульна албанай ахалагша мэргэжэлтэн Владимир Дамдинов зунай сагта ябуулдаг хүдэлмэринүүд тушаа хөөрэжэ үгэбэ. Тэрэнэй хэлэ-hээр, нуур, голнуудай хажуугаар загаhа бариха дуратайшуул олоороо обооролдодог. Инспекторнүүдэй шалгахада, бага онгосонуудаар тамарhан зон абаралгын жилет, фонарь, эмнэлгын аптечкэ, брезент г.м. хэрэгсэлнүүдээр хангагдаагүй ябадаг. Гүрэнэй инспекциин бүридхэлдэ ороодүй олон онгосонууд дайралдана. Мотоорынь арбан мориной хүсэтэй байбал, заабол бүридхэлдэ абтаха ушартай. Россиин ГИМС-эй Агын тойрогоор патрульна албанай хүдэлмэрилэгшэд хизаарай 18 аймагай дэбисхэр дээрэ оршодог гол, нуурнуудаар шалгажа ябаха уялгатай. Тодорхойлходо, Шиилхын, Краснокаменскын, Шэтын аймагай Арахлей, Кенон нуурнуудаар оло дахин ябадаг байна. Манай тойрогто Онон голой эрьедэ оршодог «Юсэн туг» гэhэн аяншалгын бааза дээрэ моторно онгосонууд ашаглагдадаг юм. Амарагшад жилет үмдөөд гол гарадаг. Агын аймагта 4-5 моторно онгосо бүридхэлдэ абтанхай. Жэл бүри Балжана нуурай, Онон голой эрьеэр амарагшад, загаhашад эгээл олоор ябадаг гээшэ. Урда жэлнүүдтэ Сагаан, Гнилое, Горбуунха г.м. нуурнууд ган жэлнүүдhээ хатаһан һаа, мүнѳѳ булта уһатай боложо, загаһашад олоор ябадаг болоо. Балжана нуурай эрьедэ байгуулагдаhан хүүгэдэй амардаг «Дружба» лагерь ошожо, үхибүүдтэ уhанай аюулhаа hэргылэлгын уулзалгануудые эмхидхэдэг заншалтай. Теэд энэ жэлдэ коронавирусай һүжэрхэдэ, лагерьнууд хүдэлөөгүй, уһанда оролгын хаһа нээгдээгүй байна. Зүгөөр бэеэ амяарлаад байлгын (самоизоляция) гуримай үнгэрхэдэ, уһанда оролгын хаһа нээгдэхэ бшуу.
ГИМС-эй албатад уhан дээрэ аюулда ороо hаа, хайшан гэжэ бэеэ ба хүниие абарха тухай заабаринуудтай хэшээлнүүдые үнгэргэдэг байна. Диилэнхидээ дүрим мэдэхэгүй, архи уугаад уhанда ороhон зон аюулда ородог. Саг үргэлжэ рейднүүдые хэнэ. Инспекторнүүд рейдын үедэ гол дээрэ ябаhан зондо ойлгууламжын, уhанай аюулhаа hэргылэлгын ажал ябуулдаг гуримтай. Зунай сагта Онон голдо, Арахлей нуурта шэнгэhэн зониие бэдэрхэ ажал ябуулаа. Эндэ һая Ононой аймагта аюултай ушар болоо. Тэндэ 4 хүн уhанда шэнгэжэ ябаһан залуу басага абаржа ябаһаар, өөһэдөө шэнгээ, наhа бараа. Энэ болбол зүбшѳѳлгүй газарнуудта уhанда ороһоной шалтагаан болоно. Зунай эхеэр залуу хүбүүн Онон голдо шэнгэжэ, наhа бараа hэн. Абарагшад хэдэн үдэрэй туршада бэдэрэл-гын ажал ябуулжа, бэеыень олоhон байна.
ГИМС-эй албанай мэргэжэлтэд Хэрын ба Акшаагай аймагуудта оршодог голнуудаар, тэрэ тоодо Нахаланда нуураар эндэ hая ябажа, шалгаад ерэhэн байна. Намарай, үбэлэй сагта Онон голые авто-унаагаар гаталан гараха газарнуудые техническэ талаар шалгадаг. Мүнөө зун тойрогто уһанда орохоор юһэн газар түхеэрэгдэхэ. Россиин ГИМС-эй Агын тойрогоор патрульна албанда 2 хүдэлмэрилэгшэд, 1 жолоошон хүдэлнэ. Тэдэнэр «УАЗ» авто-унаагаар, 2 тамардаг болон бусад абаралгын хэрэгсэлнүүдээр хангагдаhан юм.
