1755 оной январиин 25-да Ород гүрэнэй хаан хатан Елизавета Петровна Москвагай гүрэнэй дээдэ һургуули байгуулһан. Тэрэ үдэр христиан шажантан гэгээн хутагта Татьянын үдэр тэмдэглэдэг байгаа. Эндэһээ оюутадай бүхэроссиин һайндэр - «Татьянин день» бии болоһон түүхэтэй.
К.Москвитина (зүүн гарһаа 3-дахи), Л.Лемзякова, М.Грицких, М.Бехова.
Энэ һайндэрөөр дашарамдуулан, бидэ Могойтын хүдөө ажахын үйлэдбэриин техникумэй эмхидхэгшэ багша Милена Грицкихтэй оюутадай һуралсал тухай хөөрэлдэбэбди.
- Милена Евгеньевна, энэ техникум дүүргэгшэд ямар мэргэжэлтэй болоно гээшэб?
- Техникум экономико ба бухгалтерска тоосоон, компьютерна һужаа, хүдөө ажахые зайн галаар хангалга ба автоматизаци, мал аргалалга, авто-унаагай техническэ хангалга ба заһабарилга гэһэн мэргэжэлнүүдээр оюутадые бэлдэнэ. Тиигэжэ зургаан мэргэжэлдэ хүбүүд басагадые һургана: хүдөө ажахын үйлэдбэриин тракторист-машинист, автомеханик, гагнууршан, тогоошон-кондитер, цифровой мэдээсэлые болбосоруулгын мастер, бага зэргын малай аргашан.
- Хэды оюутад һуранаб?
- Мүнөө 495 оюутад очноор һурана, заочноор – 190. 2016 ондо нэгэдэхи курсда 137 оюутад ороһон байна.
- Хүбүүд, басагад һурахаяа хаанаһаа ерэнэ гээшэб?
- Агын Буряадай тойрогой аймагуудһаа, Оловяннын, Ононой, Приаргунскын, Бооржын, Шиилхын, Харымай, Краснокаменскын аймагуудһаа, тиихэдэ Шэтэ хотоһоо, Буряад республикаһаа, Монгол оронһоо ерэдэг юм.
- Оюутадай һайндэр яагаад үнгэргэхэ гэжэ байнабта?
- Тойрогой залуушуулай зүблэлэй гэшүүдые урижа, һуралсалай форум эмхидхэхэбди. Энэ хэмжээ ябуулгада оюутад дүй дүршэлөөрөө, һониноороо хубаалдаха, бэе бэетэеэ танилсаха гэжэ һананаб. Удаань багахан концерт-наада табихабди.
- Милена Евгеньевна, мүнөө һуража байһан оюутадай эрхимүүдыень нэрлыт даа...
- Техникумдэмнай бэрхэ хүбүүд, басагад олон юм. Тиигээшье һаа, нэгэ хэдыень нэрлэе. Эдэ бол Мария Бехова, Наталья Чехломова, Клавдия Москвитина, Софья Дашиева ба Любовь Лемзякова.
Дэлгэрэнгыгээр 3-дахи дугаарта.
