Энэ программын хэмжээндэ тойрогтомнай гэр абаха, гэр бариха социальна түлбэри абаха эрхэтэй залуу150 бүлэ байна. Тэдэнэй тоодо - Ага тосхоной ажаһуугша Жаргал Жалсандоржиев.
«Бидэ залуу бүлэ гээд 2008 ондо оошорто ороо һэмди. Энэ саг соо бидэ гурбан үхибүүдтэй - олон хүүгэдтэй бүлэ гэһэн зэргэтэй болообди. 35 наһа хүрэхымни урда тээ хонходожо, оошорой еһоор субсиди абаха аргатайт гээ. Бидэ 50 дүрбэлжэн метр гэртэйбди, тиигээд басагандаа амяарнь таһалга бариха гэжэ гэрээ томо болгохо һанаатайбди», - гэжэ тэрэ хөөрөө.
«Субсидиин мүнгэн гэр абалгада гү, али барилгада хэрэглэгдэдэг. Худалдажа абалга банкаар лэ хэгдэдэг. Хэрбээ айл бүлэ гэр, квартира абахаа шиидэбэл, захиргаанһаа мүнгэн зөөри үгтэхэ гэжэ баталһан свидетельство абажа, банкда тушааха болоно.
Һүүлээрнь банк захиргаан руу мэдүүлгэ үгэдэг, тиигээд баталалга абажа, мүнгэн түлэгдэдэг. Мүнгэн гэр бариха хүндэ гү, али гэр худалдаһан наймаашанда ошоно, свидетельство абаһан хүнэй гар дээрэ, али картада ороногүй», - гэжэ Агын Буряадай тойрогой Захиргаанай инфраструктура хүгжөөлгын таһагай дарга Тимур Батожапов ойлгуулжа үгэбэ.
Мүнөө үедэ гэр байраяа һайжаруулха гүрэнэй дэмжэлтэдэ хүртэһэн зон гэбэл, Ага тосхондо 86, Агын аймагта – 58 ба Дулдаргын аймагта – 6 бүлэ болоно. 2020 ондо 68 сая түхэригэй хэлсээн хараалагдана, мүнөө тэдэнэйнь 31 сая түхэригэй хэлсээн бэелүүлэгдээд байна.
