ҮЗЭСХЭЛЭНЭЙ ТАНХИМ СОО
   Бидэнэй энэ эмхи ерэхэдэмнай, ажалтадынь экскурси хээ. Уран зурааша, искусствовед, арадай уран һайханай урлалай түбэй методист Виктория Банаевагай хөөрэһөөр, ерэхэ жэл тэмдэглэгдэхэеэ байһан Усть-Ордагай Буряадай тойрогой 85 жэлэй ойдо зорюулагдаһан зарим хэмжээ ябуулганууд мүнөөнһөө эхилжэ байнхай. Тиин үзэсхэлэнэй танхим соо тойрогой 6 аймагай уран гартанай үзэсхэлэнгүүдые удаа дараалан дэлгээхэ түсэбөө бэелүүлжэ, Боохоной аймагһаа эхилээ. «Юундэ иимэ үзэсхэлэнгүүдые эмхидхэнэбибди гэхэдэ, тойрогой ойн баярта гэжэ аймаг бүхэнэй уран зураашад, уран гартан тухай хэдэн бүлэгтэй хэблэл бэлдэхэ түсэбтэйбди. Тиимэһээ шадаал һаа, тэдээн тушаа, ажалнууд тухайнь олон мэдээнүүдые бэлдэхэ, элдэб толилолгонуудые суглуулха, суглуулһанаа нэгэдүүлхэ, найруулан заһаха г.м. ехэ ажал ябуулнабди. Гадна мүнөө байһан урашуулай хажуугаар тойрогой дэбисхэр дээрэ ажаһууһан уран бэлигтэйшүүл тухай 1937 оной үеһөө эхилһэн мэдээнүүдые суглуулха һанаатайбди», - гэжэ Виктория Андреевна хөөрөөд, Боохоной аймагай уран зураашадай, уран гартанай ажалнуудай үзэсхэлэнтэй дүтөөр танилсуулаа. Энэ үзэсхэлэндэ Д.Банзаровай нэрэмжэтэ Боохоной багшанарай колледжын багша Вера Урбановагай графическа зурагууд, гобеленүүд, нооһоор нэхэн оёһон хүүхэлдэйнүүд харагшадай һонорто дурадхагданхай. Боохоной хүүгэдэй урлалай һургуулиин багша, талаан бэлигтэй уран зурааша Раиса Богомоловагай торгон дээрэ батик технологёор, мүн гуашь шэрээр зураһан ажалнууд ханада үлгөөтэй. Тиихэдэ залуу уран зурааша, дизайнер Марина Вахрушкинагай зурагууд илангаяа залуу зондо һайшаагдадаг байна. Юуб гэхэдэ, жэшээнь, «Дангина», «Селфи», «Шагай наадан», «Дивы» г.м. зурагууд дээрэнь залуу басагад, зарим дээрэнь айфон бариһан залуушуул зураатай. Тиибэшье бүхы зурагуудынь буряад сэдэбтэ зорюулагдаһан, хээ угалзануудаар шэмэглэгдэһэн гээд тэмдэглэхээр. Гадна Александровскын дунда һургуулиин технологиин багша Александр Шипняговой модо һиилэжэ бүтээһэн паннонууд, ород арадай соёл харуулһан самовар, ладья, халбага г.м. амһартанууд, Ново-Идинскэ дунда һургуулиин технологиин багша Евгений Скворцовой модо һиилэжэ хэһэн дүрсэнүүд дэлгээтэй. Эдэнь буряад сэдэбтэ зорюулагдаһан: нүүдэлшэнэй, бөөгэй, хатанай, хадаг баряад зогсоһон хүнэй г.м. дүрсэнүүд юм. Боохоной соёлой байшан өөрын ательетэй. Тэрэ ательегэй оёдолшод Лилия Мархаева ба Оксана Комаровагай суг хамта оёһон бүһэтэй, эхэнэр хүнэй заншалта хубсаһан, мүн Ольга Донскаягай хасагуудай костюм энэ үзэсхэлэн шэмэглэнэ. Иигэжэ элдэб арга хэрэглэжэ, арһаар, нооһоор, модоор, бисерээр, газетээр хэһэн г.м. уран бүтээлнүүд нилээд олон байба.

You have no rights to post comments