Могойтын аймагта хүдөө ажахын 23 үйлэдбэрилэгшэд, тэрэ тоодо хамтын 7 ажахы, 5 нээмэл бүлгэм, 11 таряашанай-фермерскэ ажахы орооhоной хүрэнгэ тарина. Тарилгын талмай 12900 га газарта нэмжынэ. Таряашад орооhото культурануудые 10500 га, нэгэ жэлдэ ургадаг зелёнко 2000 га газарта тарина. «Победа», «Хүhөөшэ» хамтын ажахынууд, «Гэрэл» нээмэл бүлгэм, П.Галсанова, Ч.Болотов, Д.Шойдоков болон бусад үргэн талмай газарта таряа тариха зорилго табинхай.
   «Бороотой зунай болоо hаа, намартаа баян ургаса хуряаха найдал бии», - гэжэ Могойтын аймагай ахамад агроном Бато Базаров мэдээсэнэ. Олон ажахынууд «Аммофос» гэhэн минеральна үтэгжүүлгэ хэрэглэнэ. Механизаторнууд ерэхэ жэлэй тарилгада 6800 гектар газарта паар бодхооно.
   Агын аймагай хамтын ажахынууд тарилгын урда тээ трактор текникэ харалгын конкурс Хүнхэрэй Сүүгэлэй полевой стан дээрэ эмхидхэhэн байна. Тэндэ «Хүнхэр», «Согто-Хангил», Калининай нэрэмжэтэ ажахынууд шангуудта хүртөө hэн. Тарилгада орооhо ургуулдаг 21 звено, 78 трактор, 122 сеялкэ, «Агромастер» гэhэн комплекс техникэ ашаглагдана. Ажахынууд механизаторнуудаар хангагданхай. Тракторнуудые шэнгэн түлишөөр хангалгын асуудал хэсүүшэг байна гэжэ мэргэжэлтэд мэдүүлнэ. Тарилгада 314 тонно солярка, 16 тонно тоhон хэрэгтэй болохо. Ажахынууд арга боломжоёо хэрэглэжэ, шэнгэн түлишэ олоно.
   Дулдаргын аймагта тарилгын ажал түсэбэй ёhоор ябуулагдана. Дулдаргын таряашад тарилгын урда тээ хүрэнгэеэ хоёр дахин сэбэрлээ hэн. «Родина» ажахыhаа бусадынь бага газарта таряа тарина. Зүдхэлиинхид 1000 гектар орооhото культурануудые, 350 га зелёнко тариха байна. «Онон» үүлтэртэ ажахы 300 гектарта орооhото культурануудые тариха түсэбтэй байгаа. Ажахын түрүүлэгшэ Батор Пурбуевай мэдүүлhээр, шэниисын хүрэнгэгүй байна. Обёосой хүрэнгэтэй. Шэниисын хүрэнгөөр хангалгын асуудал тугшанайхидай, Дулдаргын аймагай захиргаанай хүдөө ажахын таhагай мэргэжэлтэдэй урда хурсаар табигдана бшуу. Хабарай тарилгын хүдэлмэринүүд июниин хори гаран болотор үргэлжэлхэ болзортой.

You have no rights to post comments