Шэтэдэ Россиин Баатарнууд Алдар Цыденжаповта, Евгений Эповтэ болон Виктор Тюриковтэ зорюулагдаһан хүшөө барилга түгэсэбэ. Cуг алба хаажа байһан нүхэдөө ами наһанайнгаа сэнгээр абарһан мүнөө үеын эдэ сэрэгшэдэй энэ дэлхэйтэеэ хахасаһан хойнонь Россиин Баатарай нэрэ зэргэнүүд олгогдоһон. Агын матрос хүбүүн Алдар Цыденжапов, Чернышевскын аймагһаа гарбалтай спецназовец Евгений Эпов болон Балейн аймагта тоонтотой лётчик Виктор Тюриков – юрын лэ хүбүүд ябаа, теэд бусадые абархын түлөө ойр зуура соо шиидхэбэри абажа, үнэн сэхэ ябадал хээд, түүхэдэ нэрэеэ мүнхэлөө бшуу...
Мүнөө хүшөөгэй бодоод байхада, Үбэр Байгалдамнай иимэл эрэлхэг зоригтой баатарнууд байхал байна гэжэ нэрэнүүдыень мэдэжэ ябаял, баатаршалгыень жэшээ болгон, залуу үетэндөө хөөрэжэ байял гэһэн бодолнууд хүшөө харагша бүхэнэй толгойдо ороно ёһотой.
Г.Баиров (баруун гарһаа).
Гурбан баатарнуудта хүшөө бодхоохо үүсхэл Агын эдэбхитэн, хизаар ороноо шэнжэлэгшэ Гончикбал Баиров гаргажа, табан жэлэй туршада үргэлжэлһэн барилгын эмхидхэлэй хорооной түрүүлэгшэ ябаа. Эмхидхэлэй хорооной шиидхэхэ асуудалнууд олон байгаа бшуу. Түбхын түрүүн хүшөө барилгада мүнгэ таталга эмхидхэгдэһэн байна. Бүхыдөө хүшөө бодхоолгодо 6,5 сая түхэриг ашаглагдаа. 4 сая 800 мянган түхэриг хизаарай бюджедһээ һомологдоһон байна, харин нэгэ сая 600 мянган түхэриг арад зонһоо татагдаа. Тэрэнэйнь 600 мянган түхэриг гансал Агын тойрогһоо суглуулагдаа бшуу.
Хүшөө олоной ябадаг газарта – «Мегаполис-Спорт» гэһэн залуушуулай соёлой-тамирай байшан тушаа сквер соо бодхоогдоо. Барилга гурбан хубиһаа бүридэнхэй: хуби бүхэндэнь нэгэ баатарай дүрэ-зурагай гүбэгэр һиилүүр болон баатаршалгыень богонихоноор тайлбарилһан текст үгтэнхэй байна. Эдэ хубинуудые хоорондонь холбоһон зүйлнүүдынь Росси гүрэнэй гурбан үнгэтэ тугай түхэлтэй. Доронь гүрлөө сэсэг табигдаа, тэрээн дээрэ «Слава Героям-забайкальцам» гэжэ бэшээтэй. Тобшолходо, хүшөөгэй газар, хүшөөгэй хуби бүхэн гүнзэгы удхатай, ехэ бодолтойгоор хэгдэһэн байна.
Үшөө нэгэ анхархаар юумэн гэхэдэ, эдэ гурбан баатарнууд Россиин Зэбсэгтэ Хүсэнүүдэй гурбан янзын сэрэгэй түлөөлэгшэд болоно, тиимэһээ уһан сэрэг, агаарай сэрэг болон ябаган сэрэгэй нэгэдэл һүлдэлһэн хүшөө болобо бшуу гээд Гончикбал Цоктоевич тайлбарилна.
Барилгын ажалнуудые «Мостостроительный отряд №53» эмхи ябуулһан байна. Барилгын ажалнуудай түгэсэхэдэ, энэ эмхиинхид июниин 24-дэ ажалаа тушааба бшуу. Харин хүшөө нээлгын ёһолол сентябриин 24-дэ, Сэрэгэй болон албата уялгаяа дүүргэжэ ябаһаар наһа бараһан үбэр-байгалайхидай дурасхаалай үдэр, болохоор хараалагдана.
Дарима Базарова.
