- Эрдэни Дашиевич, нэн түрүүн өөр тухайгаа хөөрыт даа.
- Би 1991 ондо түрэhэнби. Алханын дунда hургуули түгэсхөөд, Буряадай гүрэнэй университедтэ hуража, географиин багшын мэргэжэлтэй болооб. 2012 ондо тус hургуули дүүргэхэдээ, Алхана тухай диплом бэшэжэ, амжалтатай хамгаалhан байнаб. Тиигээд сэрэгэй албанда ябааб, hүүлээрнь Агын аймагай Гүнэйн дунда hургуулиин директорэй hуралсалай талаар орлогшоор, географиин багшаар ажаллааб. Дулдаргын нэгэдэхи дунда hургуулида географиин багшаар, Алханын үндэhэтэнэй паркда экологиин гэгээрэлэй таhагта мэргэжэлтэнээр, Дулдаргын үдэшын hургуулида географиин ба биологиин багшаар хүдэлөөб. Мүнөө Дулдаргын хүүгэдэй уран урлалай байшанда нэмэлтэ hуралсалай багшаар хүдэлнэб, «Чёрный аист» гэжэ нэрэтэй байгаалиин-эрдэмэй шэглэлэй кружок ябуулдагби. Богонихоноор хэлэбэл, географи, биологи, хими - эдэ гурбан предмет холбоһон кружок болоно. Зунай амаралтын үедэ Алханадаа экскурсово-доор хүдэлнэб.
- Гидэй ажал танай «хобби» гү?
- Минии ажамидарал юм. Би бага балшар наhанһаа түрэл нютагайнгаа шүтөөнтэй газараар, аяншалгаар, тамираар hонирходог хүм. Алхана тухай олон ном уншааб. Экскурсоводоор ажаллахадаа, аяншалагшадта ойлгосотойгоор, удхыень алдахуулангүй, зүб мэдээсэл үгэхэ хэрэгтэй: хүн зон буддын шажан, Алханын газар дайда, хизаар орон, түүхэ тушаа олон асуудал асуудаг.
- Танай дахуулжа ябаhан зоной тоо хэды хүрөөб?
- Жэл бүри 65 мянгаhаа дээшэ хүн Алхана ерэдэг, тэдэнэй 60 хубинь ород яhатан байдаг шуу, 35 хубинь - буряадууд, үлэhэн 5 хубинь хари гүрэнhөө аяншалдаг. Коронавирусай дэлгэрхын урда тээ Африка, Сингапур, Хитад, Монгол, Дунда Азиин гүрэнүүдhээ, Европоhоо, Австрали, Америкэhээ ерэдэг байгаа. Германиhаа 6 профессорнүүдэй, 16 оюутадай эрдэм-шэнжэлэлгын дүршэл абахаяа зорижо ерэхэдэнь, гурбан үдэрэй туршада бүхы Алханаар ябажа, харуулжа танилсуулаабди. Аяар холо байбашье, иимэ нангин газар эндэ байдаг гэжэ бэе бэеhээ дууладаг байна. Хүн зон зорижо ерэдэг. Сентябрь hарада hургуулиин багшанар үхибүүдтэеэ «Амиды байгаалида гараараа хүрөөд абалга» гэhэн сэдэбээр аяншалгануудые хэдэг.
- Тон олон хэды хүниие дахуулжа үзөө hэмта?
- Гурбан экскурсоводууд 130 хүниие дахуулжа ябаа hэмди.
- Эдиршүүл болон залуушуулда ямар зүбшэл үгэхэ байнабта?
- Залуу наhандаа зоригтойгоор ябаха, хүн зондо туhатай байха, ажал хэжэ, өөдөө дабшажа ябахые оролдохо, заабол бэеэ hорихо хэрэгтэй гэхэ байнаб. Саашадаа гидэй ажал залуушуулда дамжуулха, тэдэниие hургаха зорилготойбди, бидэ ходо гидээр хүдэлхэгүй ха юмбибди даа.
- Һайнта даа.
Цымжидма ДОЛГОРОВА.
