Мүнөөдэр, мартын 31-дэ, Агын Буряадай тойрогой тосхон һуурингуудай толгойлогшонорой Зүбшэлгын Зүблэлэй суглаан онлайн аргаар үнгэргэгдөө. Суглаае тойрогой Захиргаанай хүтэлбэрилэгшын орлогшо Солбон Цыренов хүтэлэн ябуулба.
Апрель һара гараба. Үбэлдөө хэды саһан ороһоншье һаа, эндэнэй дулаан үдэрнүүдтэ саһан хаа-хаанагүй хайлажа, гал түймэрэй һүжэрхэ талаар ехэ болгоомжолхоор саг болоод байна. Хизаарай амбан захирагшын тогтоолоор, мартын 28-һаа хизаарай дэбисхэр дээрэ түймэр һэргылэмжын тусхай гурим тогтоогдонхой.
Энэл ушараар толгойлогшонорой суглаан дээрэ түбхын түрүүн түймэр һэргылхэ талаар хиналтын ажаябуулга тухай асуудал бодхоогдоо, тобшо элидхэл Россиин МЧС-эй Үбэр Байгалай хизаараар хүтэлбэриин Агын таһагай дарга Татьяна Игнатьева хээ. Тэрэнэй хэлэһээр, 2022 оной гурбан һарын туршада анханһаа түсэблэгдэһэн 12 шалгалта хэгдэһэн байна, тэдэнэй дүнгөөр тиимэ ехэ дутуу дунданууд элирүүлэгдээгүй. Зүгөөр түймэрэй гэнтэ ерэшоо һаань, хэрэглэхэ уһанай ехэ багтаамжа (ёмкость) бэлдэхэ, ой руу ороһон харгыда тусхай хаалтануудые табиха, табличкануудые тодхохо гэхэһээ эхилээд, галай гарахые һэргылэмжын ажалнуудаа саг соонь хэхэ, ходо тэрэнээ хинажа байха ёһотой гэжэ хэлэгдээ. Ямар нэгэн нютагай дэбисхэр дээрэ талын гү, али ойн түймэрэй һүжэрөө һаань, тэрэ нютагай толгойлогшо харюусалгатай байха бшуу. Тиимэһээ нютагай засаг түлөөлэгшэдтэ түймэр һэргылхын тула ажаһуугшадтай ойлгууламжын ажал ябуулхань шухала. Ой руу зоной ябалга хизаарлаха хэрэгтэй. Галай аюул һэргылэмжэ хадаа бүгэдын харюусалга болоно гэжэ хүн бүхэн мэдэрхэ ёһотой.
Удаань Үбэр Байгалай хизаарай «Мой бизнес» гэһэн түб бага ба дунда олзын хэрэг эрхилэгшэдтэ болон өөрыгөө ажалаар хангаһан зондо гүрэн түрын талаһаа ямар туһаламжа үзүүлхэ аргатайб гэжэ хизаарай бага олзын хэрэг дэмжэлтын жасын гүйсэдхэхы захирал Аюша Дондоков мэдээсээ. Энэ жасаһаа олзын хэрэг эрхилэлгэдэ зээли мүнгэ яагаад абахаб, ямар программанууд байдаг юм, хэндэ, ямар утаһаар, ямар хаягаар хандахаб гэжэ тайлбарилаа бшуу.
Тойрог дотор тамирай талаар ямар дабшалта туйлалтануудтайбибди, юун хэгдэнэб, ямар дутуу дунданууд байнаб гэжэ тойрогой Захиргаанай тамир хүгжөөлгын таһагай дарга Булат Бальжинимаев элидхэл соогоо тэмдэглээд, олоной тамираар бэеэ һорихын тула нютаг бүхэндэ тааруу эрхэ нүхэсэл зохёогдохо ёһотой гэжэ онсолон хэлээ. Жэшээлбэл, тосхон һуурингуудтамнай тамирай хэмжээ ябуулгануудай жэлэй түсэбүүд табигдадаггүй байна бшуу. Хизаар дотор тамирай 5 жэл соносхогдонхой, мүнөө хоёрдохи жэлынь ябажа байна. Тиимэһээ энэ суглаан дээрэ тодорхойлогдоһон дутуу дунданууд дээрээ ажал нютаг бүхэндэ ябуулагдаха бэзэ.
Дарима БАЗАРОВА.
"Мой бизнес" жасаһаа дэмжэлтэ.
Олоной дунда тамир дэлгэрүүлгэдэ - анхарал.
