Мартын 25-да Агын Буряадай тойрогой ветерануудай тоосоото ба һунгалтын VI конференци үнгэргэгдөө.
Конференцидэ хүндэтэ айлшад - Үбэр Байгалай хизаарай Наһатайшуулай зүблэлэй түрүүлэгшэ Иван Печенин, орлогшонь Андрей Шолохов ба 23 делегадууд хабаадаа.
Агын Буряадай тойрогой Наһатайшуулай зүблэлэй түрүүлэгшэ Цырендаши Санданов 2021 оной болзор соо хэһэн ажалаараа тоосоо, саашанхи хараа бодолнуудаа тэмдэглээ.
Мүнөө тойрогто ветерануудай эхин шатын 40 бүлгэм бии, аймагай – 3, тосхоной 1 бүлгэм ба ямар нэгэн һалбарида хабаатай 3 эмхи. Тойрогой ветерануудай эмхидэ 19018 хүн тоологдоно, тэдэнэй тоодо Эсэгын дайнай 5 ветеран, ара талын ажалай - 200, Эсэгын дайнда нүхэрөө алдаһан 64 эхэнэрнүүд, наһанай амаралтада гараһан 17952 хүн, ажалай ветеранууд – 5020.
Ц.Сандановай тэмдэглэһээр, тойрогой Наһатайшуулай зүблэлэй ажалай гол шэглэлнүүд гэхэдэ, наһатай зониие социально-экономическа, ажалай, хубиин эрхын талаар хамгаалга болоно. Мүн эрхэтэниие, залуушуулые орон нютагтаа дуратайгаар хүмүүжүүлхэ гэһэн гүрэнэй программа дүүргэлгэ юм.
Агын Буряадай тойрогой Захиргаанай хүтэлбэрилэгшын орлогшо Билигма Будаева ветерануудай һайн үүсхэл гаргадаг тухай тэмдэглээ. Жэшээнь, һүүлшын жэлнүүдтэ суута нютагаархид Ц.Жамцаранодо, П.Бадмаевта хүшөөнүүд бодхоогдоо.
Иван Печенин Агын тойрогой ветерануудай бүлгэмүүдэй ажал хизаар соо эгээ дээгүүр сэгнэгдэдэг гэжэ тэмдэглэбэ.
Дайнай, ажалай, Зэбсэгтэ Хүсэнүүдэй ба хуули сахилгын зургаануудай ветерануудай Бүхэроссиин ниитэ эмхиин Зүблэлэй Президиумэй Хүндэлэлэй грамотаар Ц.Санданов, В.Рабданов, И.Яковлева, Д.Лубсанов, С.Боло-тов, Б.Нимаев гэгшэд шагнагдаа.
Агын Буряадай тойрогой Наһатайшуулай зүблэлэй түрүү-лэгшээр дахяад Ц.Санданов, орлогшоорнь Ц.Цыбиков болон бюрогой гэшүүд һунгагдаа.
Агын Буряадай тойрогой Наһатайшуулай зүблэл өөрын Хүн-дэлэлэй тэмдэг байгуулһан байна. Иимэ тэмдэгтэ И.Печенин, Ц.Санданов, В.Цыцыков, В.Рабданов, С.Цыпылова ба Ц.Цыбиков хүртөө.
Нордоп БАБУЕВА.
