Агын Буряадай тойрогой Түлөөлэгшэдэй суглаанай гэшүүд 2021 ондо ябуулһан ажалайнгаа дүнгүүдые татаа: тоосоото болзор соо 3 зүблөө үнгэргэжэ, 29 шиидхэбэри гаргаһан байна.
Түлөөлэгшэдэй суглаанай гэшүүд уридшалан табигдаһан түсэбэй ёһоор ажалаа ябуулаа. Зарим асуудалнууд дээрэнь тобшохоноор тогтоё.
Агын тойрогой дэбисхэр дээрэ ажаһуудаг зондо социальна дэмжэлтэнүүд хэр үзүүлэгдэнэб гэһэн асуудал хараһан байна. Шиидхэбэринь - хүдөөдэ ажаһуудаг зониие социальна талаар дэмжэлтэ ашаг үрэтэй гү гэһэн шүүмжэлэл хэхыень Үбэр Байгалай хизаарай Ажалай болон ажаһуугшадые социальна хамгаалгын яаманда дурадхаа.
Олоной хабаадахаар тамир хүгжөөхэ тухай асуудалаар зүбшэлсэхэдөө, физкультурын багшанарай болон һоригшодой мэргэжэл дээшэлүүлхээр, бүридэлыень шэнэлхээр байна гэжэ дүн татаа. Шиидхэбэринь – Агын Буряадай тойрогой Захиргаанда хандажа, ажаһуугшадые олоор тамираар һонирхуулхын тула хүдөө һуурингуудта тамирай мүрысөөнүүдые эмхидхэхэ ёһотой гэжэ дурадхаа.
Һуралсалай эмхинүүдэй материально-техническэ оршон хүгжөөхэ тухай асуудал гүнзэгыгөөр харагдаа. Эгээл хүндүүлхэй асуудал гэхэдэ, үхибүүдэй түхэреэн жэлдэ амархаар болон бэеэ элүүржүүлхээр, мүн хизаарлагдаһан арга боломжотой үхибүүдэй эрхэ дүүрэнээр хангахаар түбүүд үгы. Терроризмда эсэргүүсэхэ болон түймэрэй аюулгүйе сахиха эрилтэнүүд гүйсэд бэелүүлэгдэнэгүй. Эдэ асуудалнуудые шиидхэхэ талаар таарамжатай дурадхалнууд Үбэр Байгалай хизаарай Засагай газар болон Эрдэм ба һуралсалай яаман руу эльгээгдээ.
Россиин МВД-гэй «Агинский» таһагай дарга С.Н.Эрдынеевэй тойрогой дэбисхэр дээрэ гэмтэ ябадал үүсхэлгэ 2020 ондо ямар байгааб, 2021 ондо хуули буса ябадал һэргылхэ талаар ямар ажалнууд түсэблэгдэнэб гэһэн мэдээсэл 2021 оной март һарада шагнагдаа. Харин декабрь һарада 2021 оной баримтанууд болон 2022 ондо ябуулагдаха ажал тухай элидхэл полициин дарга хээ юм.
«Агын Буряадай тойрогой хүндэтэ ажаһуугша» гэһэн нэрэ зэргэ Цыренов Цырен Бадмаевичта олгохо тухай зүбшэгдэһэн байна. Цырен Цыренов наһанайнгаа 38 жэл Агын тойрогой больницада үгэһэн. Мүнөө Үбэр Байгалай хизаарай Хуули байгуулгын Суглаанай түрүүлэгшын орлогшо, социальна политикаар хорооной түрүүлэгшэ юм, зэргэ Агын Буряадай тойрогой Түлөөлэгшэдэй суглаанай түрүүлэгшын тушаалда хүдэлнэ. «Агын Буряадай тойрогой хүндэтэ ажаһуугша» гэһэн тэмдэг Цырен Бадмаевичта 2021 оной сентябрь һарада, Агын тойрогой больницын зуун жэлэй ойн баяр соогуур барюулагдаа.
Е.Кон Ц.Цыреновтэ "Агын Буряадай тойрогой хүндэтэ ажаһуугша" гэһэн тэмдэг барюулба.
Абтажа байһан шэнэ хуулинуудые һайшааһан гурбан зүбшөөл хизаарай Хуули байгуулгын Суглаанай хороонууд руу эльгээгдээ.
Муниципальна байгуулалтануудай түлөөлгэтэ эмхинүүдэй зүблэл ажалаа үргэлжэлүүлээ. Энэ зүблэл ехэнхидээл Түлөөлэгшэдэй суглаантай суг зүблөөнүүдээ үнгэргэдэг. Ушарынь гэхэдэ, Түлөөлэгшэдэй суглаанда харагдадаг асуудалнууд барагсаан лэ нютагаа өөһэдөө хүтэлэлгын түлөөлгэтэ зургаануудай ажаябуулгада хабаатай бшуу. Жэшээлбэл, 2021 оной декабриин зүблөөндэ муниципальна байгуулалтануудай түлөөлгэтэ эмхинүүдэй хүтэлбэрилэгшэд коронавирус үбшэн һэргылхэ талаар хуулинуудта ямар хубилалтанууд оруулагдааб гэжэ танилсаа. Һуурин тосхонуудта өөһэдын шагналай гурим тодорхойлхо тухай асуудал олоной һонирхол татаһан байна. Зүбшэлсэһэнэй удаа муниципальна байгуулалта бүхэндэ шагналай гурим тодорхойлһон нормативна актнуудые абахаар гэжэ дурадхагдаа.
Тосхон һуурингуудай депутадуудай ажаябуулгатай олониие танилсуулха зорилготойгоор «Манай депутат» гэһэн эрхим толилолгын конкурс соносхогдонхой.
Нютаг һуурингуудай нэрэнүүд федеральна болон хизаарай хуули байгуулгын дүримүүдтэй зохилдоно гээшэ гү гэһэн шүүмжэлэл хэгдэжэ, хотын ба хүдөө һуурингуудай уставууд шалгагдаһан байна. Эдэ уставуудыень зүб тээшэнь болгохо зорилготойгоор тусхай ажалай бүлгэм ажал ябуулна.
Нэмэжэ хэлэбэл, Түлөөлэгшэдэй суглаанай зүблөөн бүхэнһөө тоосоон манай һониндо хэблэгдэжэ байдаг гээшэ.
Дарима БАЗАРОВА.
