Тойрог дотор санитарна сэбэрлэлгын габшагай һара апрелиин 1-һээ соносхогдонхой. Ажаһуугшад хабартаа ба намартаа нютагаа, газар дайдаяа сэбэрлэлгын ажалда эдэбхитэй хабаададаг гээшэ. Засаг зургаан ниитын хэрэгтэ дэмжэлтэ үзүүлжэ, техникэ унаагаар туһалжа байдаг шуу.
Газаа уларилай нэгэ бага урин болоходо, тойрогой ажаһуугшад оршон тойронхи газараа нобшо ноохойһоо, бог шоройһоо арилгажа, ариг сэбэр байха талаар ажал ябуулдаг.
Агын тойрогой Захиргаан тосхонуудай ба хүдөө нютагуудай хоорондо санитарна сэбэрлэлгээр мүрысөө эмхидхэдэг заншалтай. Намартаа эрхим нютагууд, тосхонууд горитойхон мүнгэн шангуудта хүртэдэг. Энэ жэлдэ ниитын хүдэлмэри аша үрэтэйгөөр эмхидхэһэн муниципалитедүүд шангуудта баһал хүртэхэ юм. Конкурс «Самое благоустроенное сельское поселение» ба «Самый благополучный административный центр, городское поселение» гэһэн янзануудаар соносхогдонхой.
Тойрогой Захиргаанай территоринуудые хүгжөөлгын таһагай даргын орлогшо Булат Раднаевай хэлэһээр, байгша ондо конкурсдо шэнэ нэмэлтэнүүд оруулагдаа. Тодорхойлходо, «Лучшее сельское, городское подворье» гэһэн шэнэ янза бии болоо. Эндэ дааша дээрээ огородой ургамал ехээр ургуулдаг, мал олоор үсхэбэрилдэг үмсын хамһабариин ажахынууд, үрхэтэ айлнууд хоорондоо мүрысэхэ юм. Оршон сагта США болон Европын олон гүрэнүүд Росси гүрэндэ экономическа санкцинуудые тохоод байна. Энэ шалтагаанһаа дулдыдажа, наймаада эдеэ хоолой, эд бараанай ба бусад зүйлнүүдэй үнэ сэнгүүд бодоно. Тиимэ тула ажаһуугшадта үмсын үйлэдбэриин эдеэ хоолоор хангагданхай байхань шухала. Намартаа баян ургасынгаа хэшэгһээ нютаг зонтоёо хубаалдаха аргатай. «Хартаабха, хапууста ба бусад эдеэ хоол ехээр ургуулха хэрэгтэй», - гэжэ мэргэжэлтэд тайлбарилна. Комиссиин гэшүүд шалгажа ябахадаа, эдэ бүгэдые сэгнэхэ болоно.
Июль һарада уласхоорондын «Алтаргана» наадан Агын талаар нэрьехэ гэжэ ниитэдэ мэдээжэ. Ехэ һайндэр харахаяа, энээндэ хабаадахаяа олон айлшад ерэхэ. Аглаг һайхан Ага нютагайнгаа шарай зондо эрхимээр харуулхын тула ариг сэбэрэй болон болбосон түхэлтэй болгохо талаар ехэ ажал хэгдэнэ ба хэгдэхэшье. Нэн түрүүн, ариг сэбэрлэлгэһээ эхилхэ юм. Тиин нааданай урда тээ ажаһуугшад оршон тойронхиёо арилгаха, сэбэр болгохо ажалаа жэншэдгүй ябуулха бэзэ гэжэ тойрогой Захиргаанай мэргэжэлтэд найданад.
Гудамжануудаар малай шабааһан нютагуудай шарай уруу дарадаг шуу. Хэнэйшье мэдэһээр, тойрогой ажаһуугшад үмсэдөө мал олоор баридаг болонхой. Малайнгаа шабааһа суглуулжа хаяхагүйдэнь, тэдэнь ехэ боложо, һалан байдал харуулдаг. Зарим хүдөө нютагуудаар ябажа харахада, малайнгаа шабааһанда дарагдаһан ушар дайралдана. Газаагуураа сугларһан шабааһа айл бүхэнэй хаяжа байбал, иимэ байдал үзэгдэхэгүй һэн. Хайлаһан саһан дороһоо нобшо ноохойнууд гаража, хабарай шанга һалхинда үлеэгдэжэ, талаар таран хиидэнэ.
Габшагай һарын соносхогдоходо, хүдөө һуурингуудай захиргаануудай, ТОС-уудай хүтэлбэрилэгшэд нютагайнгаа зониие, ажалшадаа ударидажа, сэбэрлэлгын ажалда хабаадуулна. Захиргаанууд, хамтын ажахынууд трактор болон бэшэ техникэеэ гаргажа, шабааһа шэбхэ хаяна. Тодорхойлходо, нютаг бүхэндэ үйлсэнүүдые нобшо ноохойhоо арилгаха, хото хорёонуудые, худаг, палисаднигуудые избёосхоор сагаадаха г.м. хүдэлмэринүүд ябуулагдана. Нобшо хаядаг газарнуудаар техникын абяан гаража, шууяатай болонхой.
Эрдэни Чимитдоржиев.
