«Мүнөөнэй эрхэ нүхэсэлдэ Майн 9 үдэр гол шухала һайндэр болоод байна. Манай гүрэндэ Агуу Илалтын удха шанарынь ямаршье һэжэг түрүүлдэггүй һаа, бэшэ гүрэнүүдтэ энэ үдэртэ хэдэн ондоогоор хандана, түүхын хуудаһанууд хазагайруулагдан, шэнээр зохёогдоно, шэнээр бэшэгдэнэ гэжэ харанабди», - гэһэн үгэнүүдээр Агын Буряадай тойрогой Захиргаанай хүтэлбэрилэгшын орлогшо Билигма Будаева Агуу Илалтада зорюулагдаһан хэмжээ ябуулгануудые эмхидхэлэй асуудалнуудаар мүнөөдэрэй зүблөө нээбэ.
Агын тойрогой аймаг бүхэндэ, хүдөө һуурингуудта, тосхонуудта Илалтын 77 жэл угтуулһан олон хэмжээ ябуулганууд түсэблэгдэнэ.
Эсэгэ ороноо хамгаалгын дайнай 5 лэ ветеранууд мүнөө мэндэ байна: Ага тосхондо Самбу Базаров, Дулдаргын аймагта Георгий Тимофеев, Могойтын аймагта Ануфрий Дамбаев, Гармадоржи Эрдынеев, Эрдэни Жапов ажаһуунад.
Дайнда хабаадагша нүхэрөө алдаһан 35 эхэнэрнүүд, ара талын ажалай 140 ветеранууд мүнөө жэл Майн 9-иие угтахань.
Хэдэн хэмжээ ябуулгануудай тоодо «Мүнхын жагсаал» онсо һуури эзэлнэ. Энэ жагсаалда дайнай газарта алдалан унаһан сэрэгшэд мэндэ ябаһан дүтынгөө зонтой суг жагсадаг гээшэл. Мүнөө Украинада боложо байһан тусхай дайшалхы үйлэнүүдтэ сэрэгэй уялга дүүргэжэ ябаһаар наһантаяа хахасаһан сэрэгшэдээ, аба эжынь зүбшөөлөөр, «Мүнхын жагсаалда» хабаадуулхын тула жагсаал очноор үнгэргэхэ шиидхэбэри абтанхай гээд хэлэгдэбэ.
Дарима БАЗАРОВА.
