Агын Буряадай тойрогой Захиргаанай болон «АС и Я» сэтгүүлэй редакциин хамтын түлэблэлөөр үхибүүдэй хоорондо «Подвиг Алдара Цыденжапова» гэһэн зурагай конкурс соносхогдоһон байгаа.
Ц.Жамцараногой нэрэмжэтэ хизаарай номой сангай ажалтадай эмхидхэһэн, Россиин Баатар Алдар Цыденжаповай дурасхаалда зорюулагдаһан энэ конкурсдо тойрогой хүүгэдэй уран урлалай һургуулинуудай, уран урлалай байшануудай хүмүүжэмэлнүүдэй, дунда һургуулинуудай һурагшадай зурагууд – дүн хамта 20 ажал дурадхагдаһан байна.
Эндэ һаяхан конкурсын дүнгүүд татагдажа, шангай һууринуудые эзэлэгшэдэй нэрэнүүд элирээ. Түрүү һуурида К.Базарсадаевай нэрэмжэтэ Агын хүүгэдэй уран урлалай һургуулиин хүмүүжэмэл Алина Раднаевагай «Алдар Цыденжапов» зураг хүртөө.
«Алдар Цыденжапов» зураг.
Хүндэтэй 2-дохи һуурида Агын хүүгэдэй уран урлалай һургуулиин Һүдэнтын филиалай Арюхан Лубсановагай «Портрет Героя РФ Алдара Цыденжапова» зураг гараһан байна.
«Портрет Героя РФ Алдара Цыденжапова» зураг.
Харин шангай 3-дахи һуури Агын хүүгэдэй уран урлалай һургуулиин Сарана Доржиевагай «Перед лицом смерти. Доблесть Героя Алдара Цыденжапова» зураг эзэлээ.
Баярма Баторова.
