Украинада сэрэгэй тусхай операциин боложо байһые мэдэнэбди. Агын тойрогой олохон хүбүүд cэрэгэй уялгата албаяа үнэн сэхээр дүүргэжэ, эрэлхэг зоригтойгоор дайшалхы зам гатална. Эдэниие дэмжэхэ волонтёрнуудай ажал ябуулжа байһаниинь hайшаалтай.
Эндэ һая Могойтын аймагай Сагаан-Уула нютагhаа гарбалтай, хорёод жэл Москва хотодо ажаһууһан Бабудоржи Амоголоновтой телефоной утаhаар харилсабабди.
- Бабудоржи Цыренович, зунай эхиндэ Украинада тусхай операцида ябаhан сэрэгшэдтэ ошожо, байдалыень хаража ерэhэн байнат…
- Тиихэдэ намда мухар талаан тудаhан юм гү, авто-унаагаар ябагшадай нэгэ волонтёрой ошохогүйгөө мэдүүлхэдэ, орондонь намайе абаа. Тиигэжэ Хурамхаанай, Захааминай, Хэжэнгын, Агын волонтёрнуудтай болон маанадаар ябажа байhан ламанартай танилсаа hэм. Белгородой можодо дайнай ара талада байhан сэрэгшэдтэеэ уулзаабди, ябаhан газартаа хүбүүдээ эдеэлүүлээ, сайлуулаабди, лама санаартамнай уншалгануудые бүтээгээ. Сэрэгшэд хоорондоо hайн харилсаа холбоотой байна. Тиихэдээ ямар взвод дайнай газарта ябанаб, хэн ара талада байнаб гэжэ hайн мэдэнэ. Маанадай уялга хадаа хүбүүдээ дэмжэлтэ, арга шадалаараа туhаламжа болоно.
- Волонтёрнууд тиишээ олоор ябана гү?
- Ябанагүй гэхэдэ огтолон болохогүй. Yсөөнөөр ябана. Манай гүрэнэй Юрэнхылэгшэ эндэ hая: «Арад зомнай амгалан тэнюун ажаhууна. Зунай амаралгын хаhын эхилхэдэ, зон амархаяа ошоно. Тиихэдэнь тэндэ хүбүүднай ами наhаяа хайрлангүй, байлдаан соогуур нүхэдөө алдан, Эхэ оронойнгоо түлөө тэмсэнэ. Сэрэгшэдээ тон ехээр дэмжэхэ саг ерээд байна. Сэрэгшэднай энэ дүнгэлтыемнай мэдэржэ байха ёhотой», - гэжэ тон зүб хэлээ. Бидэнэй, Росси гүрэнэй ажаhуугшадай, хамтаараа бодожо, сэрэгшэдээ дэмжэжэ, тэдээндээ тулга боложо байгаа hаамнай, байдалыньшье hайжарха, сэдьхэлынь тэниихэ… Жэшээлбэл, дайнай газарта хэрэглэгдэдэг түрүүшын туhаламжа болохо шуhа тогтоодог хэрэгсэлэй сэрэгшэ бүхэндэ байгаа hаань, ямаршье гоё hэм! Мүнөө сагта хүбүүдэй гэртээ мэндэ бусахаhаань дээрэ юун байхаб даа?! Аймаг, тойрог, шадаал hаа нютаг бүхэнhөө тиишээ волонтёрнуудай ябажа байгаал hаань hайн. Юундэб гэхэдэ, тэндэ байhан хүбүүднай нютагайнгаа хүниие харахадаа, тон ехээр хүхинэ.
- Мүнөө хоёрдохи ябадалдаа холо зорибо гүт?
- Түрүүн ошоhон газартаа ошохобди. Тэндэ үшөө хаража үзэхэбди, ябадалаараа болохобди.
- Хараhан хүнэй тэрэ зүг руу ошохонь бэрхэшээлтэй. Таанадай үүсхэжэ ябаhан хэрэг бүтэсэтэй, харгытнай арюун байг лэ…
- Тусхай операци түргөөр дүүрэжэ, хүбүүднай гэртээ мэндэ бусаг лэ. Сэрэгшэдтээ туhатай байхабди, шадал соогоо хананхалжал, хайхаржал ябахабди. Хамтын хэрэг хүсэтэй ха юм. Нэгэ hанал бодолтой, нэгэ шэглэлээр ажал үүсхэжэ ябаhан зон байхадаа урматай даа. Энэ ехэ ажал ганса маанадай hайгаар бэшэ, харин бултанаймнай ашаар бүтэнэ бшуу. Тиихэдээ бултадаа hайн байя даа.
- Вайбер соо волонтёр басагад бүлэгүүдые нээнхэй, тэндэ хүн зонhоо мүнгэ татажа, сэрэгшэдтээ туһаламжа үзүүлнэ…
- Тиигэнэ даа. Хоёр Намсалманууд (нэгэниинь - Агын – Дашидондокова, нүгөөдэнь - Хурамхаанай – Данжалова) ехэл ажал хэжэ ябана гэжэ тэмдэглэхээр. Тэдэ гол ажалайнгаа хажуугаар зонhоо мүнгэ татажа, эгээ түрүүн хэрэгтэй болодог хэрэгсэлнүүдые абана. Москва гээшэ олон зотой хото, авто-унаагаар нэгэ тээшээ гарахадаш, үдэр hалашадаг. Харгыда ехэ саг ошодог. Эдэ хоёр басагад залуу байhандаа тэсэжэ ябана даа. Намсалма Дашидондокова оймhо, дүрэмхэ, нюур гараа аршаха салфеткэ, бэеэ угаахада хэрэглэдэг хэрэгсэлнүүдые гэхэ мэтэ суглуулан абаа. Намсалма Данжалова шуhа тогтоодог жгут-турникет, бинты-гепоглос гэхэ мэтэ юумэнүүдые абаашахаяа бэлдээ. Мүн хажуугаарнь мяха, эдеэ хоол, тамхин гэхэ мэтэ зүйлнүүд абтаа. Гурбан авто-унаа хойно хойноhоо hубарилдахадаа, шэнгэн түлишыень олоной мүнгөөр даахань харамтай шэнги байгаа. Тиихэдэнь шэнгэн түлишэдэ спонсор болохо зониие олообди.
- Һайнта даа.
Валентина ЦЫРЕНЖАПОВА.
