Ага тосхоной Баатарнуудай аллей дээрэ Оросой Уласай Баатар Балдан Цыдыповтэ хүшөө табигдаха. Нээлгэнь 2023 ондо түсэблэгдөө.
Хүшөө табиха үүсхэл Агын Буряадай тойрогой дайнай, ажалай, Зэбсэгтэ Хүсэнүүдэй болон хуули хамгаалгын зургаануудай ветерануудай ниитэ эмхи гаргаһан байна. Энэ эмхиин «Живая память» гэһэн түлэблэл Үбэр Байгалай хизаарай амбан захирагшын грантнуудай конкурсдо хабаадажа, 938 мянган түхэриг шүүгээ гээд конкурсын сайт соо бэшэгдэнэ. Бүхыдөө түлэблэл бэелүүлгэдэ нэгэ сая хоёр зуугаад мянган түхэриг хэрэгтэй.
- Үе саг бүхэн өөрын баатарнуудтай. Украинада боложо байһан сэрэгэй тусхай операцида юрын сэрэгшэдэй тоодо буряад арадай хүбүүд ябана. Тэндэ тон юунэй боложо байһые «нюуса» гэһэн тамга найдамтайгаар халхална ха юм. Хаа-яахан байлдаануудта хабаадагшадһаа хоморой мэдээсэлнүүд мессенджернүүд соо бии болодог. Тиигэбэшье эгээл уршагта үйлэ хэрэгүүд олондо эли болоно. Тэдэнэй нэгэн – Агын Буряадай тойрогһоо уг гарбалтай, Урда-Ага нютагта тоонтотой Балдан Цыдыповэй дайшалхы габьяагай түүхэ... - гээд түлэблэл тодорхойлһон бэшэлгэ соо хэлээтэй.
Түлэблэл оройдоол 23-тай эрэлхэг зоригтой сэрэгшэдэ, мүн сэрэгэй албанда баатаршалга харуулжа ябаһан зуугаад залуу хүбүүдтэ зорюулагдана. Эдэ – манай үеын баатарнууд, нэгэшье баатар мартагдахагүй. Тэрэнэй тула Баатарайнгаа түүхэ бултанда, илангаяа залуушуулда дуулгаха ёһотойбди гэжэ тэмдэглэгдэнэ.
Түлэблэлэй хэмжээндэ патриотическа хэшээлнүүд, дайшалхы үйлэ хэрэгүүдтэ хабаадаһан ветерануудтай уулзалганууд эмхидхэгдэхээр хараалаатай.
Дарима БАЗАРОВА.
"Толон" газетын редакциин фото.
