Хилгэндын адагта буугаад байһан хун шубууд. Тэрэ Улаан номдо оруулагдаһан, хори буряад зоной һүгэдэн хүндэлдэг нангин шубууд юм. 2017 он.
Оршон тойронхи байгаалияа бидэ түрэһэн эхэ мэтэ хүндэлжэ, хайрлажа, гамнажа ябаха шухала уялгатайбди. Эхэ байгаалияа бидэнэй хамгаалаагүй һаа, бэшэ хэн аршалхаб? Хорото бодосууд байгаалииемнай муухай болгоно, бузарлана. Жэл бүри апрелиин 15-да оршон тойронхи баялигуудые экологиин аюулнуудһаа хамгаалха гэһэн тусхай үдэр бии. Үйлэдбэриин завод ба фабриканууд, котельни, түмэр харгын ба авто-унаанууд үдэр бүри хара муухай утаа, тортог г.м. хорото бодосуудые агаар руу хаяна. Тэрээгээрынь ургамал, амитад, хүн амилна. Экологууд, байгаали хамгаалдаг мэргэжэлтэд сошордолто байдал соносхоно.
Ага нютагаймнай байгаали арюун һайхан, тунгалаг сэбэр гол сөөрэмүүдтэй, баян ой модотой. Тойрогоймнай дэбисхэр дээрэ байгаалиин хүшөөнүүд, нангин байгаалитай Алханын үндэһэн сэсэрлиг, заказнигууд бии. Улаан номдо оруулагдаһан олон ан амитад, шубууд ажамидардаг, янза бүриин ургамал ургадаг. Элдин баялигуудтай газар нютагууднай гүрэнэй харууһан доро абтагданхай. Байгша ондо Экологиин жэлдэ зорюулагдажа, байгаали хамгаалалгын сэдэбээр зуу гаран хэмжээ ябуулга үнгэргэгдэхэ гэжэ тодорхойлогдонхой. Эндэ эдир үетэниие, ажаһуугшадые эхэ байгаалидаа эльгэлэн дурлуулха талаар һуралсалай, гэгээрүүлгын, хүмүүжүүлгын ажал ябуулагдаха.
Дэлгэрэнгыгээр 15-дахи дугаарта.
