Заншалта зүблөөндэ Үбэр Байгалай хизаарай амбан захирагша Александр Осипов, хизаарай Хуули байгуулгын Суглаанай түрүүлэгшэ Юрий Кон, сенатор Баир Жамсуев, гүрэнэй, хизаарай засаг зургаанай түлөөлэгшэд, сайдууд, тэдэнэй орлогшонор, депутадууд ба бусад айлшад хабаадаа. Үбэр Байгалай хизаарай Засагай газарай түрүүлэгшын орлогшын, Агын Буряадай тойрогой Захиргаанай хүтэлбэрилэгшын уялга дүүргэгшэ Базар Дугаржапов үнгэрэгшэ жэлэй дүнгүүдые согсолжо, 2024 ондо ябуулха ажалайнгаа хараа зорилгонуудые тодорхойлhон элидхэл хээ.
«Родина» ажахын түрүүлэгшэ Д.М.Дондоковада «Агын Буряадай тойрогой хүндэтэ ажаһуугша» нэрэ зэргэ олгогдоо. Бато ЖАМБАЛОВАЙ фото-зурагууд.
Россиин Зэбсэгтэ Хүсэнүүд Донбассай ажаһуугшадые хамгаалхын тула Украинада сэрэгэй тусхай үйлэ хэрэг ябуулна. Энэ хадаа зүблөөнэй гол сэдэбүүдэй нэгэн байгаа. Гүрэнэй сэрэгшэдэй дунда буряад арадаймнай хүбүүд эрэлхэг зоригтойгоор Эхэ ороноо хамгаална. Сэрэгшэдэй дундаһаа лейтенант Балдан Цыдыпов, ахалагша лейтенант Эдуард Норполов (наһа бараһанайнь һүүлээр), подполковник Дашибал Мункожаргалов Россиин Баатарнууд – манай омогорхол. Сэрэгэй тусхай үйлэ хэрэгтэ тойрогһоо дэмжэлтэ үзүүлэгдэнэ, байгша ондо дахяад үргэлжэлүүлэгдэхэ юм.
(Тодорхойгоор удаадахи дугаарта гараха).
Эрдэни ЧИМИТДОРЖИЕВ.
