Үзөөн һууринда 1075 хүн ажаһууна, тэдэнэй тоодо: 377 эрэшүүл, 393 эхэнэрнүүд, наһанай амаралтада гараһан 195 хүн, 105 ажалай ветеранууд, 3 ара талын ажалшад, 305 хүүгэд. «Багульник», «Шамба», «Хабсагай», «Семь тополей» гэһэн дүрбэн ТОС ажал ябуулдаг. Гадна 4 ниитэ эмхи хүдэлдэг: ветерануудай, аха захатанай, залуушуулай, соёлой зүблэлнүүд. Зүблэл бүхэн өөрын ажалтай. Жэшээлбэл, ветерануудай болон аха захатанай зүблэлнүүд дүй дүршэлөөрөө андалдалгын нүхэд ёһоной уулзалгануудта Табтаанай нютаг ошодог байна. Залуушуулай зүблэл һууринай захиргаанай дэргэдэ хүдэлжэ, ажалдань ехэхэн туһа болодог, ажаһуугшадтай һэргылэлгын хөөрэлдөө, хэмжээ ябуулгануудые үнгэргэдэг юм. Соёлой зүблэл нютагта эмхидхэгдэдэг соёлой, тамирай хэмжээ ябуулгануудай түлөө харюусалгатай һэн тула сценари бэшэдэг, концертын номернуудые бэлдэдэг г.м. Мүн лэ соёлой байшанай хэмжээ ябуулгануудые эмхидхэлгэдэ ба үнгэргэлгэдэ хубитаяа оруулдаг. Тамирай талаар хэлэбэл, волейболоор Ленинэй нэрэмжэтэ колхозой түрүүлэгшэ, СССР-эй Верховно Зүблэлэй депутат Б.Бадмаевай, бүхэ барилдаагаар Эсэгын дайнай ветеран, Дайшалхы Улаан Тугай орденой кавалер Н.Максаровай, теннисээр Эсэгын дайнда хабаадагша, 1960-аад онуудта Ленинэй нэрэмжэтэ колхозой түрүүлэгшэ Ш.Дылгыржаповай дурасхаалай шангай түлөө, дүрэ буляалдаата барилдаагаар М.Ильясовай дурасхаалта хизаарай болон тойрогой мүрысөөнүүд эмхидхэгдэдэг.
(Үгрэлжэлэлынь 4-дэхи дугаарта уншахада болохо).
Оюна ШАГЖАЕВА.
