үүхэһээ мэдэхэдэ, 1992 оной мартын 31-дэ Росси гүрэнэй орон нютагууд, тэрэ тоодо Агын Буряадай автономито тойрог бэеэ дааһан субъект болоһон гээшэ. Тойрогой дэбисхэр дээрэ гүрэнэй засаг зургаанууд байгуулагдажа эхилээ һэн. Гүрэнэй Дүүмэдэ һунгалтанууд үнгэргэгдэжэ, мүнөө сенатор ябаһан Баир Жамсуев Агын тойрогһоо депутадаар һунгагдаа. Тиихэдэ Болот Аюшиев, Намдак Жамбалов Федерациин Зүблэлэй һунгамалнууд болоһон байна. Тиин 1994 ондо Агын Буряадай тойрогой Дүүмэдэ түрүүшын зарлалда 15 депутадууд хоёр жэлэй болзорто һунгагдаа. Арадай дундаһаа эрхимэй эрхим, түрүү, үзүүр хүбүүд ба басагад зоной этигэл найдабарида хүртэжэ, түрэл тойрогойнгоо хүгжэлтын түлөө дүршэл, мэдэсэ, эршэ хүсэеэ үгэн ажаллаһан байна.
Тойрогой Дүүмын түрүүшын зарлалда һунгамалнуудай түрүүлэгшэ ябаһан Владимир Рабданов иигэжэ дурсана: «1994 ондо һунгалта үнгэргэгдэжэ, тойрогой гурбан аймагһаа таба-табан хүн һунгагдажа, 15 депутадуудай тоодо ороһон байнабди. Би Могойтын аймагай захиргаанай толгойлогшоор хүдэлжэ байгааб. Депутат болоходоо, тушаалһаа болёо һэнби. Арбан табан депутадуудай шиидхэбэреэр Дүүмын түрүүлэгшэ болоо бэлэйб.
