Ага тосхоной дурасхаалта газарнуудай нэгэн – “Слава” гэһэн һүр жабхаланта хүшѳѳ мүн.
Эсэгэ ороноо хамгаалгын дайнда алдалан унаһан сэрэгшэдтэ зорюулагдаһан энэ хүшѳѳгэй байгуулагдаһаар тэбхэр 50 жэл болобо. Мүнѳѳнэй түхэл дүрсэнь 2004-2005 онуудта урлан зохёогдобошье, хүшѳѳ ѳѳрын баян түүхэтэй юм. Табин жэлэй саана тосхоной алишье буланһаа элеэр харагдахаар газар хүшѳѳгэй һуурида шэлэгдэһэн байгаа. Шэтын архитектор В.Анискинай зохёоһон хүшѳѳгэй нээлгэ 1967 оной ноябрь һарада баяр ёһололой оршондо болоһон түүхэтэй.
"Слава" хүшѳѳ.
Энэ хүшѳѳ заһабарилжа, шэнэ комплекс бодхоохо үүсхэл 2004 ондо тойрогой Захиргаанай толгойлогшо Баир Жамсуев гаргаһан байна. Хүшѳѳгэй эрхим түһѳѳ түсэбэй конкурс соносхогдожо, Россиин хүндэтэ архитектор Болот Дондоковой “Слава” гэһэн түһѳѳ түсэб шүүһэн. Мүнѳѳ хүшѳѳ хүрэтэр парадна хэрэлсыгээр гарахаар. Хүшѳѳгэй гол хубинуудайнь нэгэн - оёоргүй тэнгэри руу шэглэһэн буугай гурбан жада. Тэдэнэй эгээл үндэрынь 36 м болодог. Эдэ гурбан жада Агын, Дулдаргын, Могойтын аймагуудай, тэдэниие хүбѳѳлһэн булад лентэ Агын Буряадай тойрогой һүлдэ тэмдэг болоно.
Дэлгэрэнгыгээр 19-дэхи дугаарта.
