(Үргэлжэлэл. Эхиниинь 18-дахи дугаарта.)
Амитадай аймаг шэнжэлхэ талаар фото-зангануудай аша туһа ехэ.
“Аргалейский” гэһэн гүрэнэй байгаалиин заказнигай байгуулагдаһаар майн 20-до тэбхэр 20 жэл болохонь. Түлѳѳлэгшэдэй суглаанай зүблѳѳнэй гаршагта агнууриин ажахынуудай ажаябуулга тухай асуудалай эгээл мүнѳѳ Экологиин жэлдэ харагдаһые мүн лэ Аргалиин заказнигай ойн баяртай эрхэ бэшэ холбохоор байна. Агнуури тухай хизаарай хуули Агын тойрогой дэбисхэр дээрэ хэр зэргэ бэелүүлэгдэдэг гээшэб гэжэ хизаарай байгаалиин баялигай министерствын амитадай аймаг хамгаалгын болон хиналтын хүтэлбэриин дарга Виктор Соколов элидхээ.
Амитадай аймаг харууһалха болон хэрэглэхэ үүргэ агнуури хинан харагшад бэелүүлдэг. 2016 ондо тойрогой дэбисхэр дээрэ үнгэргэгдэһэн 250 гаран рейдовэ хэмжээ ябуулгын дүнгѳѳр 47 хуули эбдэһэн ушар элирүүлэгдэһэн байна. Тиигэжэ хуули буса агнууриин түлѳѳ 2 уголовно хэрэг үүдхэгдээ, саарһа дансагүй 3 буу хуряагдаа, агналгын газарта ушаруулһан 101,2 мянган түхэригэй гарзын мүнгэн нэхэбэри зохёогдоо. Тойрогой аймаг бүхэндэ нэгэ нэгэ хинан харагшад ажал ябуулдаг, тэдэнэр лэ эрхэтэдтэ агнууриин зүбшѳѳл (билет) үгэдэг. Агын аймагта 568, Дулдаргын аймагта - 473, Могойтын аймагта 286 ангуушад агнууриин зүбшѳѳлтэй байна.
Агнууриин баялиг бодолтойгоор хэрэглэхын тула эндэмнай ямар ангууд, хэды толгой ажамидарнаб гэжэ саг үргэлжэ адаглагдадаг, жэл бүри тоологдодог байна. Жэшээнь, 2016 ондо тойрогой дэбисхэр дээрэ 195 хандагай, 681 буга, 5022 боро гүрѳѳһэн, 879 бодон гахай бүридхэлдэ абтаа. Булган болон шэлүүһэн тон үсѳѳн дайралдадаг байна, тэдэнэй ТОО толгой бүхыдѳѳ Дулдаргын лэ аймагай дэбисхэр дээрэ 30-40 болодог. Тиихэдэ 120-һоо 200 хүрэтэр шоно, шубууд гэхэдэ, 1526 һойр, 42011 хара хура, 16875 хүдүү тоологдожо байгаа. Һүүлэй табан жэлэй туршада эдэ амитадай тоо толгой дан ехээр хубилнагүй, харин буга болон боро гүрѳѳһэн халта олошороо гээд элидхэгшэ тэмдэглээ.
Мүн лэ тэрэ шононуудай олошоролго тон ехээр һанаа зобооно гээд хэлэбэ. Шононууд хүдѳѳ ажахынуудта ехэ хохидол асарна бшуу. Хизаарай Хүдѳѳ ажахын министерствын баримтануудаар, 2016 ондо хүдѳѳ ажахын 1500 толгой мал шононууд барижа, 7 сая түхэригэй гарза асарһан байна. Шонотой тэмсэжэ, агнууриин хаһада шоно барилгада 162 зүбшѳѳл үгтэһэн байна. Тиигэжэ 2016 ондо Агын аймагта 42 шоно, Дулдаргын - 28, Могойтын аймагта 31 шоно баригдаһан байгаа. Мүнѳѳ жэл шонын түлѳѳ субсиди дахяад үгтэжэ эхилхэнь гээд хэлэгдээ. Тэрэнэй тула 2017 ондо 3,5 сая түхэриг һомологдохоор хараалагдана...
Дэлгэрэнгыгээр 19-дэхи дугаарта.
