- Баясхалан Занданович, энэ жэлэй Сагаан һара агынхид хэр зэргэ тэмдэглэбэ гээшэб?
   - Байгша ондо эблэлэй гэшүүд Сагаалган заншалта ёһоор һүр жабхалантайгаар тэмдэглэһэн байнабди. Мартын 13-да Гомбо Цыдынжаповай нэрэмжэтэ гүрэнэй оперо болон баледэй театрай байшан соо агынхид сугларжа, уулзалгын баяр ёһололой үдэшэ эмхидхээ һэмди. Хамта долоон зуу гаран хүн сугларһан байна. Улаан-Үдэ хотодо ажаһуудаг ба холо ойроhоо ерэhэн айлшад театрай байшан соо hайндэрэй наада хаража, сэдьхэлээ хужарлаа. Дээдэ ба дунда тусхай һургуулинуудта һурадаг хүбүүд, басагадта хандажа, наадандамнай хабаадыт гэжэ уряалаа һэмди. Арадайнгаа хубсаһа үмдэһэн хүбүүд ба басагад алда хадагаар айлшадые угтаһан байнад. Хүгжэм дуун зэдэлжэ, зоной сэдьхэл hайндэрэй баяраар дүүрэжэ байгаа. Залуушуулай, дунда наhанай зоной, үбгэд хүгшэдэй арадайнгаа заншалта дэгэл, малгай үмдэhэн ерэхэдэ, ехэ зохид. Баяр ёһололой нээлгэдэ «Замбала» буддын шажанай бүлгэмэй шэрээтэ Жамсаран лама уншалга бүтээһэн байна.
   - Агаһаа айлшад ошоо бэзэ?
   - Агын Буряадай тойрогой Захиргаанай хүтэлбэрилэгшэ Базар Дугаржапов, Дулдаргын аймагай захиргаанай толгойлогшо Аюша Мункуев гээшэд хүндэтэ айлшаар буугаа һэн. Айлшаднай Буряад Уласта ажаһуудаг нютагайхидаа Сагаан һараар амаршалаад, гэр бүлэдэнь зол жаргал, энхэ элүүрые, ажалдань амжалта хүсэһэн байнад. Базар Самбаевич, Аюша Мижитдоржиевич бүлэг зондо тойрогой Захиргаанай зүгһөө хүндэлэлэй грамотануудые ба баярай бэшэгүүдые барюулаа. Шагналда хүртэһэн зон тойрогой, түрэһэн нютаг нугынгаа ниитэ ажабайдалда, буряад хэлэ, соёл, ёһо заншал хүгжөөлгэдэ горитойхон хубитаяа оруулһан байна гээшэ. Сенатор Баир Жамсуевай амаршалгын телеграмма уншагдаа. Мүн Буряад Уласай Арадай Хуралай, Улаан-Үдэ хотын арадай һунгамалнуудай Зүблэлэй депутадууд, бусад аймагуудай эблэлэй түрүүлэгшэнэр амаршалгын үгэнүүдые хэлээ бшуу. Агын эблэлэй зүгһөө амаршалгын үгэ хэлэжэ, эблэлэй ажал хэрэгүүд тушаа тодорхойгоор хөөрэжэ үгэһэн байнаб. Үшөөшье олон хүн тайзан дээрэ гаража, амаршалгын үгэнүүдые хэлээ һэн.
   - Найр наадан тушаа тодорхойгоор хөөрыт даа.
   - Агын эблэлэй эдэбхитэй гэшүүд, дуушад, хатаршад соёлой программа бэлдээ һэн. Буряад, хитад арадуудай дуунууд зэдэлжэ, үреэлнүүд, шүлэгүүд хэлэгдэжэ, амаршалгын, грузин, эстрадна, ёохор хатарнууд гүйсэдхэгдэжэ, харагшадай нюдэ хужарлуулаа. Ага нютагһаа уг гарбалтай артистнар Билигма Ринчинова, Бадма Гомбожапов, Баиржаб Дамбиев, Дулма Сунрапова, Ким Харганаев, Туяна Дамдинжапова ба бусад дуунуудые дуулаа. Нютагайнгаа артистнарта гуйлта барихадамнай, үгы гэдэггүй. Удаань «Байгал» үндэһэн арадай дуу ба хатарай театрай артистнар тайзан дээрэ гаража, концерт-наада шэмэглээ. Урданай ба мүнөөнэйшье буряадуудай ажабайдалһаа һабагшатай шог зугаатай зүжэглэмэл наада мэргэжэлтэ артистнар харуулаа. Театрай байшанай танхимаар дүүрэн һууһан харагшад хүхилдөө. Бүжэгшэдые халуун альга ташалгаар угтан абаа.
   - Наадануудай хажуугаар харагшадай һонирхол татама үшөө юун эмхидхэгдээб?
   - Концертын үедэ угсаата арадай шагай няһалалгаар, һээр шаалгаар нааданууд, буряад-монгол бэшэгээр мастер-классууд үнгэргэгдөө, уран гартанай бүтээһэн урлалтай харагшад танилсаа. Модоор урлажа дар-халһан, һэеыгээр хэһэн, хониной арһаар оёһон, нооһоор, дэлһээр нэхэһэн хэрэгсэлнүүдые харагшад һонирхоо. Тиихэдэ түмэрөөр, үнгэтэ шулуугаар хэһэн эрдэниин зүйлнүүд: мүнгэн зүүдхэлнүүд – һиихэ, бугааг г.м. хайрсагууд соо шэл доро зохидоор табигданхай. Дэлһээр нэхэһэн хубсаһанай суглуулбари, гарай бэлэгүүд зоной анхарал заатагүй татаа бшуу. Тиигэжэ Буряад Уласта ажаһуудаг Ага нютагайхид ногоогшон могой жэл угтажа, Сагаалган һүр жабхалантайгаар тэмдэглээ. 

You have no rights to post comments