Уласхоорондын хэмжээндэ үнгэргэгдэдэг болоһон һайндэрые дэлхэйн олон гүрэнүүд үргэн дэлисэтэйгээр тэмдэглэдэг юм.
   Бурханһаа үршөөгдэһэн хүүгэдэй һүлдэ аба эжын сэдьхэлдэ нангинаар һанагдадаг.
Үхибүүднай – манай баялиг, жаргал, найдал, уг удам үргэлжэлүүлхэ заяан, оршон байдалай юртэмсэ...
   1925 ондо Женевэ хотодо хүүгэдтэ амгалан байдал үршөөһэн бүхэдэлхэйн хуралдаан үнгэргэгдэһэн юм. Юрэ бусын элдэб аюулнуудһаа үхибүүдые найдамтайгаар хамгаалха ушар тэрэ сагта тохёолдоод байһан. 1949 оной ноябрь һарада Париж хотодо уласхоорондын арадай засагта үндэһэлһэн (демократический) эхэнэрнүүдэй федерациин конгресс үнгэргэгдэһэн байна. Тэндэ хүүгэдые хамгаалгын һайндэр уласхоорондын хэмжээндэ тогтоохо, нэгэ үдэртэй болгохо гэһэн шиидхэбэринүүдые байгуулһан. Тиигэжэ 1950 ондо хүүгэдые хамгаалгын уласхоорондын һайндэр түрүүшынхеэ тэмдэглэгдэһэн түүхэтэй.
   Хүүгэдые хамгаалгын уласхоорондын үдэр Агын Буряадай тойрогто үргэн дэлисэтэйгээр жэл бүхэндэ эмхидхэгдэдэг. Ага тосхоной амаралгын түбэй сэсэрлигтэ үхибүүдтэ зорюулагдаһан элдэб янзын хэмжээ ябуулганууд эмхидхэгдэдэг болон аттракционууд хүдэлдэг. Мүнөө жэл олон хүүгэдтэй гэр бүлэнэртэ зорюулагдаһан форум үнгэргэгдөө.

You have no rights to post comments