Намжилма Эрдынеева Россиин Юрэнхылэгшын болон хизаарай амбан захирагшын грантнуудта хүртэжэ, зондо туһатай түлэблэл бэелүүлнэ. Комплекс дотор аяншалагшадай амарха, экскурси хэхэ һэеы гэрнүүд, эдеэ хоол бариха һэеы гэр-ресторан байгуулагданхай. Грантнуудай хажуугаар хизаарай олзын хэрэг эрхилэгшэдые дэмжэдэг жаса этнокомплексын бии бололгодо туһалһан байна.
Байгша оной июниин 1-һээ этно-соёлой комплексдо этно-кафе ба экскурси хүдэлнэ. Июнь һарада Хитадай 200 гаран аяншалагшад хүрэжэ, кафедэ хоол баряа, экскурсида ябаһан байгаа. Мүнөөдэрэй байдалаар, этнокомплекс хари гүрэнэй аяншалагшадые угтан абана. Ажалшадынь холын айлшадые угтан абажа хооллуулна, экскурсида ябуулна, мүн айлшад буряад арадай дэгэлнүүдые үмдөөд, дүрэ зурагуудаа буулгана. Хитадай аяншалагшад буряад ба ород соёл болбосоролоор, ёһо заншалаар һонирходог гэжэ мэдээжэ. Илангаяа буряадай үндэһэн уран зурагуудай галерей хаража һонирхоно. Һэеы гэртэй этно-кафедэ аяншалагшад буряад ба ород арадуудай үндэһэн хоол – бууза, аарса, тараг, бүхэлеэр, борщ, банша, элдэб янзын саладуудые г.м. бариха аргатай. Хари гүрэнэй аяншалагшад этнокомплекс дотор табигдаһан экспонадуудые, галерей хаража, буряад арадай нүүдэлшэ ажабайдалтай дүтөөр танилсана бшуу. Намжилма Цыренжаповнагай тэмдэглэһээр, этнокультурна комплекс нэн түрүүн хари гүрэнэй аяншалагшадые буряад арадай ёһо заншалтай, гуримуудтай танилсуулха, мэдүүлхэ зорилготойгоор байгуулагдаһан гээшэ. «Серебряное кольцо» гэһэн аян замай эмхиин хүтэлбэрилэгшэ, олзын хэрэг эрхилэгшэ Булат Амагабазаров Хитадһаа аяншалагшадые урижа, тойрогой алдарта газарнуудые харуулдаг. Тэрэ тоодо «Хатан эжы» этнокомплекс асаржа, экскурсида ябуулдаг.
Дэлгэрэнгыгээр "Толон" һониной 29-дэхи дугаарта уншагты.
Намжилма ЭРДЫНЕЕВАГАЙ архивай фото-зураг.
