- Бато Цырендоржиевич, олзын хэрэг эрхилжэ эхилһэн түрүүшын алхамууд тухайгаа хөөрэжэ үгыт.
   - Би залууһаа олзын хэрэг эрхилэлгэдэ бэеэ зорюулжа, аралжаа наймаа ябуулжа эхилээ һэм. Хүршэ Хитад руу ябажа, тэндэ олон нүхэдтэй, танилтай боложо, хоорондын харилсаа бэхижүүлээ һэм. Тиигэжэ Ага нютагтаа хари гүрэнэй аяншалагшадай ба манай нютагай зоной амарха газар байгуулжа, тэрэниие хүгжөөхэ үнинэй хүсэл зорилготой ябааб. Тиин 2018 онһоо Хитадай аяншалагшадтай хүдэлжэ эхилээб. «Хорхог» фестивалиин үнгэргэгдэдэг газарта долоон жэлэй саана хоёр майхан татажа, хари гүрэнэй аяншалагшадые амаруулдаг, сэнгүүлдэг байгаабди. Анхан энэ газарта үсөөн зоной ажаһуудаг һуурин байһан. Галай аюулда дайрагдажа, һууринһаа юуншье үлөөгүй. Хитадай аяншалагшадай сүлөө сагаа ашатайгаар үнгэргэхын тула сэрэгэй наадануудые эмхидхэжэ һамааруулдаг һэмди. Тэрэ жэлынь Хитадай табан зуугаад аяншалагшад манда ерээ. Удаадахи 2019 ондо мянган гаран хүн болоо һэн. Харин тиихэдэнь Агымнай зон үсөөн ябаха. Хитадтай ажалаа тогтууритай ябуулжа байтарнай, 2020 ондо халдабарита үбшэн һүжэржэ, хилэ хаагдашоо. Хари гүрэнэй аяншалагшад ябахаа болишобо.
   - Хүшэр сагай ерэхэдэ, аяншалгын буланаа хүгжөөхын тула ямар шиидхэбэринүүдые абажа эхилээбта?
   - «Кочевник» этнокомплексын ажаябуулга тогтоонгүй ябуулхын ба тойрогойнгоо ажаһуугшадые олоор ерүүлхын тула ямар нэгэ үйлэ хэрэг, хэмжээ ябуулга эмхидхэхэ хэрэгтэй гэһэн бодол түрөө. Эрын гурбан наадаар: бүхэ барилдаагаар, һур харбалгаар, мори урилдаагаар олон мүрысөөнүүд үнгэргэгдэдэг ха юм. Харин эдеэ хоолой зүйлнүүдые буйлуулгаар фестивальнууд тойрогто нэгэшье эмхидхэгдэдэггүй байгаа. Теэд ямар юумэ эмхидхээ һаа, манда хэрэгтэйб, олзо оршотойб гэжэ бодообди. Тойрогой Захиргаанай территоринуудые хүгжөөлгын, анализай ба түсэблэлгын таһагай дарга Баира Дашидымбрыловатай зүбшэлсэжэ, гастрофестиваль байгуулха шухала гэжэ хэлсээбди. Тэрэ үедэ тойрогой Захиргаанай хүтэлбэрилэгшэ ябаһан Буянто Батомункуевтай уулзажа, түсэбөө хөөрэхэдэмнай, тэрэ дэмжээ һэн. Тиихэдэ тэрэ дороо олондо мэдүүлхэгүй гэжэ оролдообди. «Хамшагай дэлгэрээд байхада, ямар фестиваль хэхэеэ һанаабта!» гэжэ арад зон хэлсэнэ аа гү гээд аниргүй ябаабди. Хойто жэлынь, 2021 оной август һарада, эмхидхэхэ гэжэ байтараа, «болохогүй» гэжэ дуулаад, намарынь октябрьда одоошье эмхидхээ һэмди. «Тур-акселератор» түсэлэй программаар дэмжэлтэ абажа, түрүүшын фестиваль үнгэргэгдөө. Тиихэдэ олон хабаадагшад, айлшад байгаагүй бшуу.

You have no rights to post comments