- Базар Самбаевич, «Толон» һониной уншагшадта хураалдан тухай хөөрөөд үгыт. Манай нютаг можоһоо үшөө хэд ошооб?
   - Хуралдаан Россиин Федерациин Юрэнхылэгшэ Владимир Владимирович Путинай даалгабаряар үнгэргэгдөө. I ба II хуралдаануудай Улаан-Үдэ хотодо эмхидхэгдэһыень мэдэнэбди. Мүнөө форумдо 35 гүрэнэй лама санаартан, эрдэмтэд, шэнжэлэгшэд, гүрэнэй ба ниитэ ажаябуулагшад ерэжэ, багсаахада, 50-яад хэмжээ ябуулгада хабаадаа.
   Үбэр Байгалай хизаарай амбан захирагша Александр Михайлович Осиповой даалгабаряар, Хальмаг Уласай Толгойлогшо Бату Сергеевич Хасиковай урилгаар тэндэ хабаадааб. Агын Буддын шажанай академиин ректор Сультимов Чингиз лама, Үбэр Байгалай хизаарай амбан захирагшын орлогшо Аягма Гармаевна Ванчикова, Үбэр Байгалай хизаарай гүрэнэй дээдэ һургуулиин ректор Оксана Олеговна Мартыненко гэгшэд ябаабди. Баир Баясхаланович Жамсуев Россиин Федерациин Федеральна Суглаанай Федерациин Зүблэлэй зүгһөө хабаадаа.
   Хальмаг Уласай ниислэл хото Элһэтын «Ойрат-арена» тамирай байшан соо «Буддийский мир в новом тысячелетии» гэһэн хуралдаанай нээлгэ эмхидхэгдээ. Тэндэ Россиин Федерациин Засагай газарай түрүүлэгшын орлогшо Дмитрий Чернышенко Россиин Федерациин Юрэнхылэгшэ Владимир Путинай зүгһөө хуралдаанда хабаадагшадые амаршалаа, амгалан байдалай түлөө үрэ дүнтэйгөөр хүдэлмэрилхыень хүсөө. Хальмаг Уласай Толгойлогшо Бату Хасиковай хэлэһэн үгэнүүдые дамжуулха хүсэлэнтэйб: «...Манай Юрэнхылэгшэ Владимир Путин: «Будаадын шажан Россида эб найрамдалай, һайн һа нал бодолой шажан» гээд тэмдэглэдэг. Түмэн зон сэдьхэлдээ һүзэгтэй ба һайхан байдалда байгуулха эрмэлзэлтэй байгаа сагтаа ямаршье баршадые гаталха аргатай. Нүхэдөө дайсан болгонгүй, хоорондохи зүрилдөөгөө үгы хэхэ сэдьхэлтэй байхань шухала. Мүнөө эндэ үндэр заяатай лама санаартан, эксперт болон эрхим хүтэлбэрилэгшэд, эрдэмтэд олоор суглараа. Бүгэдөөрөө оролдожо, эндэ шангахан хүдэлөө һаа, нэгэ алхамаар һайхан байдал дүтэлүүлхэ арга боломжотой байнабди. Ерээдүйдэ тиимэхэн лэ байдал үри һадаһадтаа орхихо ёһотойбди. Ом маани бадмай хум», - гэһэн үгэнүүдээр элидхэлээ дүүргээ. Дээгүүр тушаалтай сайдууд, орон нютагтаа буддын шажан дэлгэрүүлдэг лама санаартан нээлгын баяр ёһололдо элидхэлнүүдые хээ. Хальмагууд ба буряад-монголшууд нэгэ хүхүүртэй арад байһан гээд тэмдэглэгдэдэг. Тэрэньшье зүб байгаа гэжэ һанахаар. Хэлыень ойлгожо ядахаар бэшэ байнхай һэн. Нээлгын баяр ёһололдо хальмаг арадай түүхэ болон буддын шажанай дэлгэрһэн тухай зүжэг харуулагдаа. Һүүлшын оньһон технологи хэрэглэгдэһэн байхадаа, гоё зүжэг табигдаа.
   - Хуралдаанай зорилгонь...
   - Буддын шажан Россида II Екатерина хатанай үедэ гүрэнэй дэмжэлтэтэй болоһон гээшэ ааб даа. Буддын шажанай Росси гүрэндэ дэлгэрһэнһээнь бидэ Будда Шэгэмүүниин айладхаһан һургаал ном үзэхэ аргатай байна гээшэбди. Бүгэдэндэ эб найрамдал байгуулха, арад зондо суртаал ном дэлгэрүүлхэ, уласхоорондын харилсаа бэхижүүлжэ, амгалан байдал тогтоохо, нангинаар сахигдадаг баялигуудаа зандань үлөөхэ, дунда һургуулиин үхибүүд ба дээдэ һургуулиин оюутадта һайхан мэдэрэл түрүүлдэг һургаал ба журам нэбтэрүүлхэ гэхэ мэтэ сэдэбүүдээр хуралдаанда хабаадагшад элидхээ.

You have no rights to post comments