Ноябриин 22-то Россиин Баатар Эдуард Норполовой нэрэмжэтэ Агын 5-дахи дунда һургуулида «Память» гэһэн сэрэгэй-патриотическа музей нээлгын баяр ёһолол үнгэргэгдөө.
Хүндэтэ айлшан – сенатор Баир Жамсуев амаршалгын үгэ абахадаа, шэнэ һургуулида сэрэгэй музей дэмыдэ байгуулагданагүй гэжэ тэмдэглэһэн байна. «Тосхоной 5-дахи дунда һургуули баатар хүбүүнэй нэрэ зүүгээд ябана хадаа эдир үетэниие хүмүүжүүлгэдэ онсо анхаралаа хандуулжа, һуралсалаа ябуулха ёһотой. Гүрэн дотор тохёолдоод байһан бэлэгүй сагта дунда һургуулинуудта сэрэгэй талаар хүмүүжүүлгэ эдэбхижүүлхэ шухала. Залуушуул үнгэрһэн сагай сэрэгэй түүхэ ба мүнөө үеын байдал һайнаар мэдээд, ойлгоод ябаха ёһотой», - гэжэ Баир Баясхаланович хэлээ.
Сенатор музейдэ Шпагинай суута автомат бэлэглээ. Мүн хизаарай амбан захирагша Александр Осиповой бэлэг дамжуулһан байна. Тиихэдэ сенатор түүхэтэ буунуудые: немецкэ автомат МП-40, Калашниковай автомат бэлэглээ. Ананда Дондоков Макаровай пистоледэй, Сокто Мажиев наганай македүүдые, 1941 оной дурамбай бэлэглэһэн байна. Удаань сенатор Баир Жамсуев, тойрогой Захиргаанай хүтэлбэрилэгшын уялга дүүргэгшэ Ананда Дондоков, һургуулиин захирал Гэрэлма Бадмаева, хизаарай Хуули тогтоолгын Суглаанай түрүүлэгшын нэгэдэхи орлогшо Сокто Мажиев ба бусад айлшад хүндэлэн татаатай улаан лентэ хайшалаа.
Музей соо Эсэгэ ороноо хамгаалгын Агууехэ дайнда ба һүүлэй үеын дайн байлдаануудта зорюулагдаһан, мүн «Герои нашего времени» гэһэн гаршаг доро Россиин Баатар Эдуард Норполовой ба нютагай сэрэгшэ хүбүүдэй абажа ябаһан хэрэгсэлнүүдэй үзэсхэлэн табигдаатай. Эдуард Норполовой түрэлхид зула бадараагаа, хүбүүнэйнь баатаршалга, нэрэ мүнхэлхэ хэрэгтэ горитойхон хубита оруулһан зондо, тэрэ тоодо сенаторта, тойрогой Захиргаанда, һургуулиин хүтэлбэридэ баярые хүргөө.
