- Чингис Алексеевич, нэн түрүүн, танай намтартай танилсая...
   - Ага тосхондо түрэһэнби, юрист мэргэжэлтэйб. Дотоодын хэрэгүүдэй, сүүдэй приставүүдэй албануудта, олзын хэрэг эрхилэгшээр, багшаар г.м. ажаллаһан байнаб. 2022 ондо сэрэгэй тусхай үйлэ хэрэгтэ һайн дураараа хабаадаха эрхэтэдые абажа эхилхэдэнь, би түрүүшын тоодо орожо, Агаһаа СВО-до мордоо һэм. Дайсадай хамгаалалтын газар абажа ябатараа, хүндөөр шархатажа, госпитальдо аргалуулаад, удаань гэртээ бусааб. 2025 ондо «Герои – Победы. Будущее» гэһэн хизаарай түсэлдэ хабаадажа, хэдэн шата даабаринуудые дабажа, илагшадай тоодо ороһон байнаб. Элдэб һуралсал гарааб, олон хүнтэй танилсааб, дайшалхы нүхэдтэй болооб. Тойрогой Захиргаанай хүтэлбэрилэгшын орлогшын тушаал дурадхахадань, зүбшөөлөө үгэһэн байнаб.
   - Харюусалгатай тушаал эзэлээд байхадаа, ямар зорилго, уялганууд дээрэ хүдэлнэбта?
   - Сэрэгэй тусхай үйлэ хэрэгтэ хабаадаад, гэртээ табигдаһан, эрэмдэг болоһон эрхэтэдтэй ажал ябуулнабди. Гал дүлэтэ дайнда хабаадажа, халуун бурма соогуур ябаһан сэрэгшэдтэ алишье талаар дэмжэлтэ, анхарал хандуулха шухала. Дайнай ветеранууд гэртээ ерээд, юу хэхэб, туһаламжа эрижэ, хэндэ хандахаб гэхэ мэтые мэдэнэгүй. Элдэб асуудалнуудаар манда хандана. Тусхай үйлэ хэрэг үргэлжэлжэл байна, хэзээ дүүрэхэб – мэдэгдэнэгүй. Шуһата дайн байлдаанда хабаадаһан зоной тоо үдэр бүри олон болоно гэхэдэ алдуугүй.

You have no rights to post comments