Агын Буряадай автономито тойрогой соёлой габьяата хүдэлмэрилэгшэ Цынжидма Цырендашиева залууһаа эхилжэ, оршон үе болотор дүн хамта таби гаран жэлһээ үлүү сагта Согто-Хангил тоонто нютагтаа соёлой ажал эдэбхитэй ябуулжа байнхай. Цынжидма Шойдоковна олон жэлэй туршада нютагтаа хоорой бүлэгэй ударидагшаар, соёлой байшаниие даагшаар ажаллаад, һүүлдэ Абида Арсалановай нэрэмжэтэ Согто-Хангилай хүүгэдэй уран урлалай һургуулиин захиралаар, мүнөө багшаар ажаллажа ябаһан намтартай. Бэлигтэй хүн алишье тээшээ тэгшэ абьяастай байдаг. Тэрэ сүлөө сагтаа шүлэгшье найруулдаг гээшэ. Багшын байгуулһан «Тэршээхэн унаган» гэһэн хүүгэдэй аман зохёолой бүлгэмэй, «Магтаал» гэһэн ансамблиин артистнар олон жэлэй хугасаада арадайнгаа соёлтой танилсуулжа, нютагайхидаа омогорхуулжа, хүхеэжэ ябадаг юм. «Тэршээхэн унаган» бүлгэм байгуулагдаһан сагһаа хойшо аймагай, тойрогой, хизаарай мүрысөөнүүдтэ хабаадажа, оло дахин амжалта туйлажа, нэрэеэ дээгүүр нэрлүүлдэг. Согто-Хангил нютагай хэдэн үеын эдиршүүл аман зохёолой бүлгэмдэ ябажа, тэдэнэй дундаһаа бэлигтэй зон олон гараһан юм. Оршон сагта Цынжидма Шойдоковнагай хүтэлбэри доро эдир артистнар Агын аймагай, тойрогой, хизаарай, бүхэроссиин хэмжээнэй мүрысөөнүүдтэ эрхимээр хабаадажа, түрэл тоонто нютагаа нэрлүүлжэ ябаһандань урмашамаар.
