«Хүнхэр» ажахын таряашад орооһото культурануудые тарихаяа бэлдэнэ, трактор техникэеэ заһабарилна. Хэнэйшье мэдэһээр, хүнхэрэйхид үргэн талмайда шэниисэ, обёос, ешмээн тарижа, намартаа баян ургаса абадаг. Энэ жэлдэ харюусалгата кампанидаа удангүй дахяад орохо юм. Малшадай буусануудта эхэ хонидой, үнеэдэй түрэлгэ эхиеэ абажа байна. Ананда Дондоков ажахын түрүү хонишон Бадмасадо Кишиктобазаровай, залуу малшан Намсарай Суюлай, «Социальная отара» программаар хони арьбажуулагша Эльвира Цыбенжаповагай, таряашанай-фермерскэ ажахые даагша Чингис Алексеевэй буусануудта хүрэжэ, ажал хэрэгүүдтэйнь танилсаа. Үдын хойно Хүнхэр нютагай соёлой байшан соо нютагай эмхи зургаануудта ажалладаг зонтой, юрын ажаһуугшадтай уулзалга эмхидхэгдээ. Ажаһуугшадай һанаа зобоомо, мүнөөдэрэй талада байһан хүндүүлхэй, шиидхэгдээгүй асуудалнууд олон байгаа гэхээр. Жэшээнь, зайн галаар, түлеэгээр, залуу кадрнуудаар, илангаяа эмшэдээр хангалга г.м.
   Ананда Цыдыпович асуудал бүхэниие зүб тээшэнь шиидхэхые оролдохобди гээ. Уулзалгын түгэсхэлдэ Ананда Дондоков «Хүнхэр» ажахые 27 жэл хүтэлбэрилһэн, Агын тойрогой хүдөө ажахын хүгжэлтэдэ горитойхон хубитаяа оруулһан Баир Шойсороновто Агын Буряадай тойрогой Захиргаанай зүгһөө Хүндэлэлэй грамота барюулаа. Баир Жалсанович «Агын Буряадай автономито тойрогой хүдөө ажахын габьяата хүдэлмэрилэгшэ», «Россиин АПК-гай хүндэтэ хүдэлмэрилэгшэ» нэрэ зэргэнүүдтэ хүртэһэн.

You have no rights to post comments