Түрүүшын хэшээлнүүдые Гал-Загда Абидуевай һэеы гэр соо 27 хүүгэдтэ зааһан байна. Сагаан һарын һүүлээр 17-иинь үлэһэн. 1913 ондо Жигмидон Дылык багша ерээ. Балдан Батоев гэжэ шадалтай хүнэй гэртэ һургуули зөөһэн, тиихэдэ 3-дахи ангида 7 шабинар һураа, 2-дохидо – 6, 1-дэхидэ – 10 гаран хүүгэд.
   1915 оной эхиндэ Забайкалиин можын арадай училищинуудай инспектор һургуули, шабинарай эрдэм мэдэсэ шалгаад, һургуулиие хуулиин ёһоор баталха гэһэн дүн гаргаа. Һүүлээрнь олон юумэн һайн тээшээ хубилжа эхилһэн гээшэ. Элдэб янзын 50-яад ном, классна шоото, бодолгын хайрсагууд, глобус г.м. асарагдаа. 1914 ондо дархашуул Доржо Самаев ба Бабу Дылгыров һургуули бариһан, удангүй тэрэнь гэнтэ шатаһан. 1915 ондо Харымай аймагай Пакулово сэлеэнһээ ажаһуугшадай мүнгөөр һургуули болохо гэр худалдажа абтаа. Тус һургуулида олон хүүгэд эрдэм шудалжа гараһан.

You have no rights to post comments