Ажалай амта эртэ таниһан
   Олег хүбүүн Урда-Агада 1991 оной сентябриин 18-да Михаил ба Тамара Тукеевтэнэй гэр бүлэдэ гурбан хүүгэдэй дундахинь боложо түрэһэн, абгайтай, дүү хүбүүтэй. Бага наһаниинь нютагтаа хүлөө шоройдоһоор үнгэрөө, наадаһаар, хүдэржэһөөр үндыгөө. Урда-Агынгаа дунда һургуулиин 9-дэхи анги дүүргэһэн юм. Тиигээд абатаяа барилгын ажалда ябаа, Хара-Шэбэр нютагта харгы барилгада хүдэлөө. Удангүй Хара-Шэбэр нютагай Виктория Острешко басагантай хуби заяагаа ниилүүлһэн байна.
   Залуугаар бүлэтэй боложо, элдэб ажалнуудые хэдэг байгаа. Михаил абань – гартаа дүйтэй, ажалша, бэрхэ хүн. Олег багаһаа абаяа дахажа, ажалда дүршэһэн. Хүн зоной захилаар абатаяа сарай, сээниг, бани, гэр хүрэтэр баридаг бэлэй. Абань мүнөө нютагайнгаа дунда һургуулида модошо дарханаар хүдэлдэг, эжынь гэрэйнгээ байдал баряад байдаг.
   Олег сэрэгэй албанда татагдажа, эрэ хүнэй уялга дүүргэһэн. Ангарск хотодо Дотоодын хэрэгүүдэй яаманай дотоодын сэрэгүүдтэ алба гараһан байна. Гэртээ бусаад, олон жэл вахтова аргаар элдэб ажалда хүдэлөө.

You have no rights to post comments