Удаан хүлеэгдэһэн зунай амаралта үргэлжэлһөөр. Үхибүүдэй амардаг лагерьнуудай нэгэн - Дулдаргын аймагай Балжанын нуурай эрьедэ оршодог «Дружба» лагерь. Энэ лагерьта амарагшадтай, ажалтадтайнь танилсахаа Балжанын нуур ошоһон байнабди. Тус лагерь Дулдарга һууринһаа 45 модоной зайда оршодог. Тэндэ амаржа байһан үхибүүдые адаглажа харахада, ехэ согтой залитай, хүхюутэй ябана: иишэ тиишээ гүйлдэнэ, бэе бэетэеэ һонинуудаараа хубаалдана - богонихоноор хэлэбэл, һонирхолтойгоор сагаа үнгэргэнэ. Тус лагериин дарга, Дулдаргын уран урлалай байшанай директор Э.Х.Загдаева лагерь тухай тодорхойгоор хөөрөөд, хүдэлжэ байһан ажалтадтаяа танилсуулһан байна.
Үхибүүд нааданай үедэ.
ЛАГЕРЬ ТУХАЙ
Зун соо «Дружба» лагерь 400 үхибүүдые амаруулха юм. Лагериин халаан бүхэн өөрын шэглэлнүүдтэй. Жэшээнь, түрүүшын «Вектор успеха» халаан июниин 10-һаа 30 болотор үргэлжэлѳѳ. Энэ халаан Россиин һурагшадай хүдэлөөнэй хэмжээндэ ябуулагдаа: хүбүүд, басагад ударидалга, зохёохы ажал, элүүр энхэ байдал, тиихэдэ һайн дураараа ябагшад, хизаар ороноо шэнжэлэлгэ тухай элдэб янзын мастер-классуудта, тренингнүүдтэ ябажа, олон юумэ мэдэхэ болоо бшуу.
Хоёрдохи «Планета 3Д» («Дерзай, Дружи, Действуй») халаан уран урлалай шэглэлтэй юм. Тус халаанай дарга Наталья Владимировна Шемелина 1989 ондо Агын багшанарай училищиин гурбадахи курс дүүргээд, «Дружба» лагерь дадал дүршэл гарахаяа ерэһэн байна. Тэрэнэй хэлэһээр, тэрэ сагта энэ лагерь хэмжээгээрээ бага, дэбисхэр дээрэнь жаахан гэрнүүд (дачанууд) ба томо майхан табяатай байгаа. «Би энэ лагерьта 5-дахи жэлээ хүдэлжэ байнаб: хоёр жэлэй туршада хүгжэмэй хүтэлбэрилэгшөөр ажаллааб, һүүлээрнь халаанай даргаар томилогдооб. Хоёрдохи «Планета 3Д» халаан июлиин гурбанһаа эхилээд, июлиин 23 болотор үргэлжэлхэ. Ажалтад июлиин хоёрто лагерь ерэжэ, үхибүүдые угталгада бэлдээбди. Манай халаанда Дулдаргын аймагай нютагуудһаа, Новосибирск, Шэтэ, Санкт-Петербург, Улаан-Үдэ хотонуудһаа үхибүүд ерээ. Тэдэ хүгшэн ба нагаса аба эжынэртээ зунай амаралтада айлшалан ерэнэ бшуу. Табан отрядтайбди, нэрлэбэл: «Забайкальский Эрондондом», «Комета», «Стражи Галактики», «Новое поколение» ба «Элита». Отряд бүхэн вожататай, хүмүүжүүлэгшэтэй, тэдэ булта багшын дээдэ һургуулитай юм. Жэл бүри лагерь хүгжэнэ гэжэ ажагланаб. Жэшээлбэл, энэ жэл сонхын шэнэ хүшэгэнүүдтэй, светомузыкатай, прожекторнүүдтэй болообди, харагшадай танхимай шала хушагдаа. Тиихэдэ Дулдаргын уран урлалай байшанай багшанар мүнөө жэл ехэ оролдолго гаргажа, олон сэсэгүүдые тариһан байна. Столоводо дежурна отряд үдэшэ бүри тэдэниие уһалдаг. Манай халаанда олон кружогууд хүдэлнэ. Ямар кружогто ябахабиб гэжэ үхибүүд өөһэдөө шэлээ: пластилинээр элдэб янзын дүрсэнүүдые хээ, хатараа, волейбол, футбол наадаа, эмшэнэй һургуули гараа, гитара дээрэ наадажа һураа, «оригами» кружогто ябаа, «Талын дуун» кружогто дуу дуулаа, бүхэ барилдаанай кружогто ябаһан байна. Нёдондо жэлһээ хүүгэдэй тоо үсөөрөө. Юуб гэхэдэ, гэрнүүдэй хоёрдохи дабхарта үхибүүдые байлгахань хоригдожо, үхибүүдэй тоо үсөөн болоо бшуу (зургаан отряд байһан аад, табан отряд болоо)», - гэжэ тэрэ хөөрэбэ.
Дэлгэрэнгыгээр 29-дэхи дугаарта.
