Декабриин 18-да Ород гүрэнэй эрхэтэдэй байдал бүридхэдэг эмхинүүдэй (ЗАГС) хүдэлмэрилэгшэд мэргэжэлтэ һайндэрөө тэмдэглэхэнь.
Аяар холын 1917 оной декабриин 18-да Совнарком «Эрхэтэдэй гэрлэлгэ, нарайлалга бүридхэхэ баримта бэшэгэй данса ябуулха тухай» хуули абажа, Советскэ Союзай айл бүлын байдал хинадаг түрүүшын данса байгуулагдаһан гэжэ тоологдодог. Тэрээн соо эрхэтэн өөрынгөө дураар гэрлэхэ, үбгэн һамган хоёр адли тэгшэ эрхэтэй байха гэжэ тодорхойлоотой, мүн хэдэн үшөө ондоо хуулинууд гараһан байна. Тэрэ сагһаа ЗАГС бии болоһон юм. Урдань ород шажан метрическэ ном ябуулжа, ЗАГС-ын бүхы ажал бүтээдэг байгаа.
ЗАГС-да долоон янзын хэрэг бүридхэгдэдэг: гэрлэхэ, гэр бүлын һандарха, хүүгэдэй мүндэлхэ ба хүнэй нүгшэхэ ушарнуудые дансалалга, үхибүүдые эсэгын нэрэдэ оруулга, хүүгэдые үргэжэ абалга, нэрэеэ һэлгэлгэ.
1995 оной декабриин 8-да хүсэндөө ороһон «Россиин Федерациин гэр бүлын кодекс» хуулиин ёһоор айл доторхи харилсаан хинагдадаг.
ЗАГС-ын хүдэлмэрилэгшэд декабриин нэгэндэ ветерануудаа урижа, энэ һайндэрѳѳ тэмдэглэһэн байна.
Агын ЗАГС-ын баримтанууд дээрэ бодомжолхоор.
2015 онһоо 2017 он болотор нарайлалга үсѳѳрѳѳ: жэшээнь, 2015 ондо 594 үхибүүд, харин 2017 ондо 516 хүүгэд мүндэлөө. Хоёр жэлэй саада тээ 245 айл бүлэнэр бии болоо, мүнөө жэл - 225. Гэр бүлын һандаралга нэгэ хубяар доошоо болобо. 2015 ондо 104 хүүгэд эсэгын нэрэдэ оруулагдаһан байна, харин 2017 ондо - 120 хүүгэд.
