Январиин 19-дэ үнгэргэгдэһэн Россиин Дотоодын хэрэгүүдэй «Агинский» таһагай зүблѳѳндэ Агын тойрогой, аймагуудай засаг зургаануудай хүтэлбэрилэгшэд уригдаһан байна.
Ушарынь гэхэдэ, энэ таһагай дарга Сокто Эрдынеев 2017 ондо хэһэн ажалаараа тоосоо хэхэдээ, гол түлэб, шиидхэгдээдүй, хүндүүлхэй асуудалнуудта зүб-лѳѳндэ хабаадагшадай анхарал хандуулаа.
Тойрогой Захиргаанай хүтэл-бэрилэгшэ Бато Доржиевай тэмдэглэһээр, иимэ заншалта тоосоото суглаанууд хадаа үрэ дүнтэй, һайн ерээдүйтэй хэмжээ ябуулга мүн. Юундэб гэхэдэ, тоосогшод ажалаа согсолходоо, нэгэ мүһэн ямар хүндүүлхэй асуудалнуудтайбибди гэжэ бүридхэнэ, тэрээнһээ дулдыдан, саашанхи ажалаа хараална, түсэблэнэ.
Полициин болон нютагай засаг зургаануудай ажалай гол зорилго тон адли гэхээр. Олон тоото хуули буса ябадалнуудые эдэ зургаануудай хамтын хүсѳѳр усадхахаар, һэргылхээр байна. Жэшээнь, үхэр мал хулгайн асуу-дал. Урдань, колхозуудай байха үедэ ажаһуугшад ээлжээгээр үхэр малаа адуулдаг һэн. Мүнѳѳ Сокто Эрдынеевэй тоосоон соо үхэр мал хулууха ушарнууд үсѳѳрнэгүй гэжэ тэмдэглэгдээ. Тиимэһээ адуулга һэргээбэл, энэ хуули буса ябадал һэргылэгдэхэ һэн гэжэ хэлэгдэбэ. Тоосоото жэлдэ Дулдаргын аймагта хуули буса ябадалнууд олошороо гэжэ элидхэгдэбэ. Энэ һанаа зобоомо асуудал шиидхэхын тула тойрогой, Дулдаргын аймагай засаг зургаануудай болон полициинхидай суг хамта һэргылэмжын ажалнуудые ябуулхань шухала.
Үнгэрһэн жэлдэ тойрогой 80 жэлэй ойдо зорюулагдаһан олон тоото хэмжээ ябуулга-нууд үнгэргэгдѳѳ, тэдэниие эмхидхэлгэдэ полициин таһагай үүргэ ехэ байгаа. Мүнѳѳ дүн татахада, полициинхид ажалаа тон һайнаар хэһэн байна - гол зорилгоёо, ниитын аюулгүйе сахилга үндэр хэмжээндэ эмхидхээ гэжэ тойрогой хүтэлбэрилэгшэ сэгнэбэ.
2017 ондо Россиин Дотоодын хэрэгүүдэй «Агинский» таһаг табигдаһан зорилгонуудаа гүй-сэд бэелүүлээ: хүниие алаһан, тонуул дээрмэ хэһэн гэмтэ нюурнууд булта элирүүлэгдээ. Гансал Агын үндэһэн музейдэ болоһон хулгай үшѳѳ мүрдэгдэһѳѳр. Һүүлэй үедэ улам дэлгэржэ байһан хуули буса ябадалнуудай шэнэ янза - интернет хэрэглэжэ, мэхэ ябадал гаргаха ушарнууд олошороо. Наһаа хүсѳѳгүй ажаһуугшадай гэмтэ ябадал гаргаха баримтануудаар Үбэр Байгалай хизаар Росси дотор 1-дэхи һуури эзэлдэг гэжэ Сокто Николаевич тоосоон соогоо тэмдэглэбэ. Тойрогой дэбисхэр дээрэ үүдхэгдэһэн 29 уголовно хэрэгээр наһаа хүсѳѳгүй хүүгэд гэршэлэгшэд болоһон байна. Иимэ сошордолтой баримтануудые бүгэдэ олониитын анхархаар байна. Ниитын газарта хэгдэһэн хуули буса ябадалнуудай дунда дахяад һогтуугаар жолоодо һуугшадые элирүүлгын баримтанууд тон олон. Бүхыдѳѳ тойрогой дэбисхэр дээрэ иимэ 100 ушар элирүүлэгдээ. Иимэрхүү ушарнуудые һэргылгэдэ, мүн ниитын аюулгүйе сахилгада хасагуудай дружинануудые хабаадуулха хэрэгтэй. Участковонуудай таһагуудые мүнѳѳ сагай эрилтэдэ таарама болгожо заһабарилха хэрэгтэй гэхэ мэтэ олон асуудалнуудаа тойрогой полициин дарга тобойлгоһон байна.
Хизаарай «Щит и лира» гэһэн мүрысѳѳндэ Могойто тосхоной баритон Александр Бимбаев дахяад эрхимлэһэн юм. Дулдаргын аймагай Үзѳѳн нютагай участково Эрдэм Дугаров Үбэр Байгалай эрхим участково болоо һэн шуу. Агын полици хизаарай аймагай полициин эрхим таһаг болоһон габьяатай. Иимэ үрэ дүнгүүдтэй коллектив ажаһуугшадай, ниитын аюулгүйе сахилгада үнэн сэхээр албаяа хааһаар.
