Аглаг талата,
алтан сэргэтэ,
Аялга дуута
ажалша арадтай,
Алдар солотой Агын
талын дэбисхэр дээрэ
Алталмал оройтой дасамнай
Амгалан тайбан
хүгжэн байхань болтогой!
– гэhэн hайхан үгэнүүдээр Агын дасанай 215 жэлэй ойн баярай нээлгэ эхилбэ. Булган туургата буряад арадайнгаа үндэhэн хубсаhатай найр наада хүтэлэгшэд эгээ түрүүн Агынгаа дасанай аяар холын 1811 онhоо эхитэй түүхэтэй танилсуулба. Удаань Агын дасанай шэрээтэ Цыбиков Бадма ламхай, Yбэр Байгалай хизаараар дид хамба Дондукбаев Цырен ламхай, Yбэр Байгалай хизаарай амбан захирагша Александр Осипов, Оросой Холбоото Уласай сенатор Баир Жамсуев, Оросой Холбоото Уласай Баатар, Оросой Холбоото Уласай Гүрэнэй Дүүмын депутадта кандидат Балдан Цыдыпов, Yбэр Байгалай хизаарай Засагай газарай түрүүлэгшын орлогшо, Агын Буряадай тойрогой Захиргаанай хүтэлбэрилэгшэ Ананда Дондоков, Yбэр Байгалай хизаарай Хуули тогтоолгын Суглаанай түрүүлэгшын нэгэдэхи орлогшо Сокто Мажиев гэгшэд амаршалгын үгэнүүдые хэлэбэ. Амбан захирагша Александр Осипов «За усердие на благо Забайкальского края» гэhэн шалгарһанай тэмдэг гэсхы Амгалан Жаповта, Yбэр Байгалай хизаарай амбан захирагшын Хүндэлэлэй грамотануудые Шэтын «Дамба Брайбунлинг» дасанай шэрээтэ Баир Цымпиловтэ, Агын дасанай ажахые даагша Биликто Дондоковто, Yбэр Байгалай хизаарай Засагай газарай Хүндэлэлэй грамота гунир лама Бадма Цыренжаповта барюулаа. Оросой Холбоото Уласай сенаторай баярай бэшэгтэ оюун сэдьхэлэй, эрдэм гэгээрэлэй аша үрэтэй ажаябуулгын түлөө, Будда бурханай hургаалнуудые дэлгэрүүлхэ хэрэгтэ ехэ хубитаяа оруулhанайнгаа түлөө шэрээтэ Цыбиков Бадма ламхай хүртөө. Yбэр Байгалай хизаарай Хуули тогтоолгын Суглаанай түрүүлэгшын баяр ламанар Солбон Согтоевто, Очир Цыренжаповта соносхогдоо. Yбэр Байгалай хизаарай Агын Буряадай тойрогой Захиргаанай Хүндэлэлэй грамотануудаар мэдээсэлэй секретарь Цыдып Тудупов, гунир лама Балдан Цырендоржиев шагнагдаа. Yбэр Байгалай хизаарай Росгвардиин Хүтэлбэриин ветерануудай зүблэлэй «За помощь фронту» гэhэн ниитын медаль Угдаанай «Содномдоржайлинг» дасанай шэрээтэ Тумэн Ринчиновтэ барюулагдаа.
Үргэлжэлэлынь "Толон" һониной 2026 оной 36-дахи дугаарта.
