Элинсэгүүдһээ эхитэй
   1980-яад онуудта «Зугаа» ансамбль байгуулагдажа, Агын Буряадай тойрогой ажабайдалда эли тодо, һаруул «одо мүшэн» мэтэ ялараа һэн. Ямаршье на-һанай зоной илгаагүй, илангаяа залуу үетэнэй дура сэдьхэл эзэлээ бэлэй. «Зугаагай» уянгата дуунууд доро хэды олон залуушуул үндыгөөб...
Хүтэлбэрилхэ, олон хүниие ударидаха гээшэ баһа шадабари гээшэ ааб даа. Энээнэй үндэһэндэ гэртэхинэй оролдолго, хүмүүжэл байдаг. Батоев Доржинима абань 1925 оной, түрэһөөрөө тогтор хуасай омогой, баатаржаан харгана омогой бүлэдэ үндыһэн. Гончигой Гонгор хүгшэн абань 4 хүбүүдтэй байһан. 1936 ондо НКВД-гэй хүдэлмэрилэгшэдэй Зугаалайн дасан һандаргаахаяа ерэхэдэ, бүлэг хүбүүд дасанаа тойроод, шиидам баряад хамгаалжа зогсоһон ха. НКВД-гэй урдаһаа тэдэ юу хэхэ һэм даа... Колыма руу тушаагдаа. Гурбан хүбүүдынь ангиин дайсадай хүүгэд гэгдэһэн. Ехэ Доржопалам ахань нэрэ обогоо һэлгүүлхэеэ арсаад, Гонгоров обогтоёо үлөө. Доржинима хүбүүе баатаржаан харгана омогой Жамсаранай Бата нагасанарынь үргэжэ абаһан. Гурбадахинь Гончиков обогтой болоо, одхон Цырендоржонь – Базаров. Абань 1943 ондо Эсэгэ ороноо хамгаалгын Агууехэ дайнда Украинска фронтдо дайлалдаад, һүүлдэнь япон милитаристнуудые хюдалсаа, удаань Хойто Солонгосые сүлөөлэлсэһэн юм. Дайнай һүүлээр намай дээдэ һургуули дүүргээд, намай шугамаар Шандалиин түрүүлэгшэһээ эхилээд, Хара-Шэбэртэ түрүүлэгшэ Бальжинима Мажиевай орлогшоор хүдэлһэн. Баһал намай шугамаар 1965 ондо Могойтын аймагай ГАИ-гай түрүүшын даргаар томилогдоһон байна. 1957 ондо Агын эрхим 5 һуршад, тэдэнэй тоодо Доржинима Батоев Москвада залуушуулай ба оюутадай бүхэдэлхэйн VI фестивальда буряад һурша номоор харбаһан. Тэндэ хабаадажа байһан полягууд: «Хэдэн метрһээ энэ жаахан бүлэн оножо байһан зон томо щит һэнгэргүй онохот» гэжэ гайхалдаһан ха. Абадань «уласхоорондын дүримөөр классическа номоор харбагты», - гэжэ хэлээд, англиин Greenhorn фирмын номо һуршатайнь бэлэглэһэн түүхэтэй. Нютагаа бусажа, Доржинима Батоев һур харбаашан Дандар Дансарановтай классическа һур харбалга хүгжөөжэ эхилээ. Агын Буряадай тойрогто хоюулаа һур харбалгаар СССР-эй түрүүшын мастернууд юм. ГАИ-гай дарга 1974 ондо ехэ шуурган соогуур Могойтоһоо Зугаалай ошожо ябаһан автобусой һаатаад байхада, хэдэн дахин зониие Могойто зөөжэ абарһан габьяатай.
   Агын Буряадай тойрогой эрхим волейболистнуудай нэгэн Цырендоржо абгань Кремлиин ордон соо дуу дуулаһан, Агын тойрогой, Шэтын можын мүрысөөнүүдэй нэгэтэ бэшэ лауреат болоһон. Гадна Саратов хотодо бүхэроссиин хүдөөгэй наадануудта мүнгэн медальда хүртэһэн юм. Доржинима абань бэрхээр баяан, мандолина дээрэ наадаха абьяастай, уран һайханай харалгада оркестртэ наададаг байһан. Гэртээ бүхы хүүгэдынь, одхон Баясхаланшье хүгжэм, аялга бэедээ шэнгээжэ үндыгөө. Аханарынь булта гитараар наададаг. 9-дэхи ангиин Баясхалан Москва ошоходоо, гэртэхиндээ бэлэгэй мүнгэ үлөөгөөд, нооһо хиргалгада хүдэлжэ олоһон мүнгөөрөө Чехословакиин Cremona гэжэ 70 түхэригтэ (тэрэ үедэ гашуухан сэнтэй) гитара абаад ерэһэн юм. Тэрэ гитарань хүбүүндэ хүгжэмэй үргэн харгы нээжэ, гастрольдо удаан сагай туршада ябаһан байна.
   Цырендоржиева Дулма Гатаповна эжынь Шэтэдэ англи хэлэнэй курснуудые дүүргээд, Урда-Агын, Табтаанайн һургуули-нуудта, һүүлээрнь наһанай амаралтада гаратараа, Зугаалайн дунда һургуулида англи хэлэ зааһан. Соёлтой, эрдэмтэй, алиш талаар эрдэм мэдэсэтэй багшын олон шабинар англи хэлэнэй багшанар болоһон.
   Батор ахань Россиин физическэ культурын ба тамирай габьяата хүдэлмэрилэгшэ, нэрэ хүндэтэй олон шабинарые хүмүүжүүлһэн, Могойтын хүүгэдэй ба эдиршүүлэй тамирай һургуулиин захиралаар хүдэлһэн. Баради ахань – һур харбалгаар тамирай мастер, МВД-гэй полковник, Болот ахань футбол, хоккей, волейбол, теннис наададаг, Бабу ахань мэдээжэ шодоог байһан. Гэр бүлөөрөө булта тамиртай, соёлтой нягта холбоотой юм.

You have no rights to post comments