Хабаадагшад, айлшад Могойтын соёлой байшанай фойе соо дэлгээгдэһэн үзэсхэлэн-яармагтай танилсаа. Эмхи бүхэн хүн зондо туһатай, хэрэгтэй түһөө түсэб бэлдээд ерээ. Һонирхолтой олон түһөө түсэбүүд байгаа.
Жэшээнь, Могойтын 3-дахи дунда һургуули «Исследовательская работа в лаборатории» гэһэн түһөө түсэбтэй ерээ. һуралсалай ба методическа ажалай талаар директорэй орлогшо Ирина Сандановагай хэлэһээр, һургуулидань олон талаан бэлигтэй үхибүүд һурадаг, тэдэ бүхэроссиин хэмжээндэшье һайн дүнгүүдые туйладаг. Тиимэһээ шэнжэлэлгын ажал ябуулха лаборатори хэрэгтэй гэһэн түһөө түсэб бэлдээ. Амидхаашын «Номин» хүүгэдэй сэсэрлигэйхид 2 түһөө түсэб дурадхаа. 1-дэхинь - «Пошивочная мастерская». Сэсэрлигэй хүдэлмэрилэгшэд, гэртэхин ба социальна партнёрнууд суг хамта оёдолой мастерской нээгээд, элдэб хубсаһа, костюмуудые оёдог. Жэшээнь, гусарнуудай костюмуудые оёо, хүүгэд энэ хубсаһаараа Ага тосхоной түб талмай дээрэ жагсаалда хабаадаһан байна. 2-дохи «Умные дворики» гэһэн түһөө түсэбэйнь бэелүүлгэ дүүрэхэ тээшээ болоо. Сэсэрлигэй дэбисхэр 5 хото хорёо болгон хубаагдажа, үхибүүд һонирхолоороо – тамирай, этно-хото хорёо г.м. газарта аша үрэтэйгөөр сагаа үнгэргэхэ юм.  Хабаадагшад олон мэргэжэлтэ экспертнүүдтэй харилсажа, тэдэнһээ зүбшэл заабаринуудые абаа бшуу. Сагаан-Уулын дунда һургуули «Холбольдже-нур – центр воспитания экологической культуры» гэһэн түһөө түсэбтэй ерээ. Биологиин ба химиин багша Цырегма Мункуевагай хөөрэһөөр, Холбоолжын нуур 2008 ондо түрүүшынхеэ Шэтэдэ оршодог байгаалиин нөөсэнүүдэй, экологиин ба криологиин институдай эрдэмтэдэй хүтэлбэри доро һурагшад үзэһэн, шэнжэлһэн байна. Урдын сагта Сүүгэлэй дасанай ламанар энэ нуур хүнэй бэедэ туһатай гээд эндэ ходо амардаг байһан ха. Шэнжэлэлгын дүнгүүдээр, уһаниинь магниево-хлоридна бүридэл-тэй гэжэ гараа, дабһатай энэ уһан хүнэй яһанда туһатай. Гадна үшөө дорохи шабарынь – илово-сульфидна юм. Россиин габьяата врач, профессор Т.Белокриницкая сагаан-уулынхидай түһөө түсэбтэй танилсажа, Шэтын эмнэлгын академидэ шабараар һонирхохо, зүб тээшэнь хэрэглэхэ зон олон байха, суг хүдэлэе гэжэ дурадхаа. Юундэб гэхэдэ, шабарай илово-сульфидна бүридэл эхэнэрэй үбшэнгүүдтэ ехэ туһатай гэжэ тэмдэглээд, тиишэнь үбшэнтэдые эльгээжэ, аргалха боломжо тухай хэлээ. Цырегма Жалсановна эмшэдтэй иимэ ажал ябуулха бэлэн, мүнөө дээрээ һурагшадтаяа Холбоолжын нуур аршалха тухай түһөө түсэб бэлдээд, тэрэмни бэелүүлэгдэхэ гэжэ найдана. Могойто тосхоной «Туяа» сэсэрлигэй хүмүүжүүлэгшэ Эржена Жигмитовагай хөөрэһөөр, тэдэ хизаарлагданги арга боломжотой үхибүүдтэй, гэртэхинтэйнь ажал ябуулна. Сэсэрлигэй сайт дээрэ, вайбераар гэртэхинтэй харилсаха оршон байдал зохёогдонхой. Аймагай хүүгэдэй зүбшэлгын бүлэг байгуулагдаһан. Сэсэрлигэй ажалтад һуралсалай ба хүмүүжүүлгын талаар гэртэхиндэ хамһалсахые оролдодог байна.

You have no rights to post comments