Эгээл мүнөө үедэ, үдэртөө дулаан болоходо, гол горход аргаахан хайлажа эхилээ. Тиимэһээ гол дээгүүр ябагааршье ябахань аюултай болоо. Апрель hарада гол горход шууян урдажа эхилдэг. Һүни хүйтэн хоноходоо, гол мүльhэн зандаа шэнги байдаг. Бага онгосонуудые хинан шалгадаг гүрэнэй инспекциин (ГИМС-ын) Үбэр Байгалай хизаараар Агын участогай инспектор Бато Раднаевай хэлэhээр, гол дээгүүр унаагааршье, ябагааршье гарахадаа болгоомжотой ябаха саг ерээ. Үбэр Байгалай хизаарта болоһон ушарнууд гэхэдэ, Шиилхэ, Энгидэй голнуудые авто-унаагаар гаталжа ябаһан зоной уhан руу ороһон, шэнгэһэн hүрөөтэ ябадалнууд элирээд байна.
   Үнгэрэгшэ жэл бороотой, шииг нойтотой жэл байжа, гол горходой эрьеһээ халиһыень мэдэнэбди. Тиимэһээ голнууд үргэн ба гүнзэгы болонхой. Инспекторнүүд рейднүүдые эмхидхэжэ, гол дээрэ ябаhан зоной уhанай аюулhаа hэргылэмжэтэй байхын тула ойлгууламжын ажал ябуулдаг гуримтай. Голой, нуурай хажуугаар бү ябагты гэһэн удхатай аншлагууд табигдана. Теэд зарим зон аюултайень ойлгожошье байгаа һаа, тойроод ябахаяа залхуураад, дүтыень хаража, гол дээгүүр сэхэ ябана.
   Инспекторнүүд ажаһуугшадта гол дээгүүр ябахадаа, аюулгүйе сахиха шухала дүримүүдые иигэжэ тайлбарилна. Нэн түрүүн, зузаан мүльһэтэй газараар ябахые оролдохо. Зузаан мүльһэн гэжэ һанаад ябажа байтартнай, мүльһэн соорожо болохо. Хэрбэеэ мүльһэнэй хаха һүрэжэ, уhа руу унабал, шаг шууяа табингүй, уhанhаа түргэн гарахые оролдохо. Нэгэ хүлөө мүльhэн дээрэ табяад, удаань бэеэ гаргаха. Мүльhэн дээрэ гарахадаа, аргаахан эрье руу мүлхихэ. Уhанай аюулда ороhон хүндэ түргэн туhаламжа хүргэхэнь шухала бшуу. Үхибүүдые бүдүүн зоной харууһагүйгөөр гол руу бү табигты, илангаяа мүльһэнэй хайлажа байһан үедэ. Гэртэхин хүүгэдтээ уһанай аюул тушаа хөөрэжэ, ойлгуулжа байха зэргэтэй. Загаhа бариха дуратайшуул нуурай хажуугаар олоороо ябадаг гээшэ. Уhан дээрэ загаhа барихада, амархада аятайшье hаа, аюултай байдагынь мэдээжэ. Бага онгосонуудаар тамарhан зон абаралгын жиледүүдээр, фонарьнуудаар, эмнэлгын аптечкэнүүдээр, брезентээр – тон шухала хэрэгсэлнүүдээр хангагдаагүй ябадаг. Россиин ГИМС-ын Агын тойрогоор инспекторнүүд эдэ эрхэтэдтэй уулзажа, ойлгууламжын ажал ябуулдаг. Хэрбэеэ үшөө дахин хуули хазагайруулһан зонтой уулзабал, административна яла тоходог. Инспекторнүүд намарай, үбэлэй сагта Онон гол авто-унаагаар гаталан гараха газарнуудта шалгалтануудые ябуулдаг заншалтай. Эндэ Онон голдо дүтэ оршодог 7 муниципальна байгуулалтын газар дэбисхэр шалгалтада ородог. Мүнөө үбэл Бооржогонтой, Хүһөөшэ нютагуудай дэбисхэр дээрэ Онон гол дээгүүр ябаха харгы нээгдэһэн аад, һая хаагдаа.
   Үнгэрэгшэ зун ГИМС-ын албанай инспекторнүүд зунай сагта хизаарай ажаһуугшадые үерһөө абаржа, олон нютагуудаар ябаа. Харымай Курорт-Дарһан, Сретенск, Шиилхын аймаг руу оло дахин ябаһан байна. Ехэ голнуудаар уhанда шэнгэhэн зониие бэдэрхэ ажал үргэнөөр ябуулаа. 2018 ондо 1 хүн уhанда шэнгэжэ, наhа бараа. Абарагшад онгосо, түргэн туhаламжа үзүүлдэг аптечкэ, абаралгын баллон, жилет, уhанда ородог һэрбээ хүл (ласты), баг г.м. хэрэгсэлнүүдээр хангагдаhан байдаг. Хоёр онгосотой. Мүнөө зун Ага, Онон, Элеэ голнуудта дүтэ оршодог нютагуудай дэбисхэр дээрэ уhанда оролгын (пляж) газарнуудые олоор нээхээр түсэб табигдана. Могойтын ба Дулдаргын аймагуудай дэбисхэр дээрэ оршодог хүүгэдэй лагериин дэбисхэр дээрэ уһанда орохо газарнууд эмхидхэгдэхэ бшуу.

You have no rights to post comments