Энэ хэмжээ ябуулгада Россиин Федерациин Федеральна Суглаанай Феде-рациин Зүблэлэй гэшүүн Баир Жамсуев, Үбэр Байгалай хизаарай Засагай газарай түрүүлэгшын социальна асуудалнуудаар орлогшын уялга дүүргэгшэ Аягма Ванчикова, Россиин Федерациин Ажалай Баатар Далай Гунгаев, Агын Буряадай тойрогой, аймагуудай засаг зургаанай түлѳѳлэгшэд, лама санаартан, Агын хүүгэдэй уран урлалай байшанай хүмүүжэмэлнүүд, Ага тосхоной эмхинүүдэй хүтэлбэрилэгшэд, ажаһуугшад г.м. хабаадаа. 1997 онһоо Агын Буряадай тойрогһоо Россиин Федерациин Гүрэнэй Дүүмын депутат боложо һунгагдаад, 20 жэлдэ тойрогой хүгжэлтэдэ сэгнэшэгүй ехэ хубитаяа оруулһан, тамирай мүрысѳѳнүүдые үнгэргэлгэдэ, нангин шүтѳѳнэй газарнуудые һэльбэн шэнэдхэлгэдэ туһаламжа үзүүлдэг ба бэшэшье буянтай, холын хараа бодолтой, туһатай ажал ябуулһан гээшэ.
   Иосиф Кобзоной нэрэ, дурасхаал мүнхэлһэн самбар нээхэ хүндэтэ эрхэдэ Баир Жамсуев, Аягма Ванчикова, тойрогой Захиргаанай хүтэлбэрилэгшын уялга дүүргэгшэ Владимир Шойжилжапов, тосхоной захиргаанай толгойлогшо Буянто Батомункуев, Агын хүүгэдэй уран урлалай байшанай директор Татьяна Данцанова гэгшэд хүртѳѳ. Самбарай нээгдэһэнэй удаа хүн зон хүндэтэ депутадай хүндыень ёһолжо, сэсэгүүдые табибад. Баир Баясхаланович амаршалгынгаа үгэ соо «1997 он болотор Иосиф Давыдович манда мэдээ-жэ артист, ниитэ ажаябуулагша гээд суутай байгаа, харин Агын тойрогой һунгагшадай политика руу харгыень нээжэ, тэрээндэ этигэл найдабарияа үзүүлһыень үндэрѳѳр сэгнэдэг, омогорходог һэн. Иосиф Давыдович соёл хүгжѳѳлгэдэ, уран урлалай байшангуудые ба һургуулинуудые байгуулха хэрэгтэ олохон юумэ хэһэн. Тиимэһээ тэрэнэй нэрэ Агын хүүгэдэй уран урлалай байшанда зүбѳѳрѳѳл олгогдоо…» - гэжэ тэмдэглээ.
   «…Агын хүүгэдэй уран урлалай байшанда Иосиф Кобзоной нэрэ олгохо гэһэн үйлэ хэрэг манай сенатор Баир Жамсуевай үүсхэхэдэ, бидэ депутадуудтаяа хамта нэгэн дуугаар дэмжэһэн байнабди», - гэжэ Буянто Батомункуев хэлээ.
   Энэ үдэрһѳѳ Иосиф Давыдович Кобзоной нэрэмжэтэ болоһон Агын уран урлалай байшанда үнгэргэгдэһэн тус хэмжээ ябуулгын үедэ хүндэтэ депутадай бүлын зүгһѳѳ тэрэнэй дурасхаал хүндэлжэ, нэрыень мүнхэлжэ байһан Агын тойрогойхидто баяр баясхалан хүргэһэн бэшэг уншагдаа.
   Һүүлээрнь бүгэдэ сугларагшад уран урлалай байшан руу экскурсида уригдажа, хүмүүжэмэлнүүдэй уран гоёор хэһэн бүтээлнүүдые хараха аргатай байгаа.

You have no rights to post comments