Урдаhаань Доржо үбгэниинь иигэжэ харюусаба:
- Заа, бараг даа! Тиимэ тарган бэшэб гэжэ мэдээрэй! Гахай hармагшан хоёршни яhала зохидоор тааралдаад, бэе бэедээ hаадгүй байна ха юм. Намтай суг хүдэлдэг Дондогой hамган Крым амархаяа ошоод байна. Эндэ hая үбгэндөө хонходожо, баяртайгаар дуулгана hэн: «Бишни эндэ элдэб шабараар шабуулжа, орёолгожо, аяар хоёр хиилээр турааб». Барhан, Дондогой урматай гээшэнь олиггүй.
Дарима асууба:
- Дондог юундэ «барhан» болоо юм бэ?
Доржо харюусана:
- Ши тэрэнэй заан мэтэ томо тарган бэетэй Ханда hамгыень хараагүйш. Тэрэнэй хоёр хиилээр турахада, «Мерседес» машинын сэн хоёр түхэригөөр унагааһантай тон адли.
Һогтуу хүршэнэр
Гэрэлма ипотекээр хотодо олон дабхартай шэнэ гэртэ квартира худалдажа абаад, ехэ баяртай ажаллаба, бараа худалдажа абаад табиба. Квартирань 8-дахи дабхарта, дээрэнь хүршэнэр бии. Одоошье, өөрын гэртэй боложо амархань шуу. Шэнэ гэртэ оролгын баяр наада кафедэ үнгэргэбэ. Теэд… Дээрэнь байрлаhан хүршэнэрынь тэнгэреэр ниидэhэн сэдьхэлэйнь баярай хоёр дали тайража, гутаажа hалгаhан юм.
Тушаан болоходоо, үү татай, дээрэнь архинша бүлэ байрлаhан байгаа. Yдэр hүнигүй хашхаралдаан, дуу дуулалдаан, бархираан, хатаралдаан…
Гэрэлма архиншадтай хэлэнэйнгээ хататар, хоолойнгоо hөөлдэтэр хэрэлдээд, хэды дахин полицида мүргөөдшье туршаа. Теэд нэгэ хэды саг соо ан-бун боложо аалидаад, уданшьегүй потологынь галзуугаар дорьбожо, hогтуугай дуун ханхинажа эхилдэг ушартай.
Тиимэhээ Гэрэлма орой hүниин тэн хүрэтэр ажалдаа hуудаг болобо. Гэртээ унтаад лэ, эртэ үглөөгүүр ажалдаа талииха.
Теэд амаралтын үдэрнүүдтэ яаха аргагүй тэсэхэ хэрэгтэй ха юм. Мүнөөшье хүнжэлөөрөө толгойгоо хушаад хэбтэнэ. Гэнтэ үүдэнэйнь хонхо зэдэлбэ. Хэн гээшэб?
Гэрэлмагай дурата дурагүй бодоод, үүдэеэ нээхэдэнь, урдань, үү татай, бурхан зайлуул, дээрэхи hогтуу хүршэ эхэнэрынь зогсожо байба. Сухалтай гээшэнь аргагүй! Боошхотой спирт мэтэ «анхилжа» байгаад хаагалба:
- Ши, культурна гэргэн, уhанайнгаа турбаагай кран хааха шадалгүй гүш? Шинии квартираhаа маанад дээрэ уhан адхараад урдажа байна. Гарнуудыешни таhа мушхаад, тархи тагалсагыешни ходоро таhалжа хаяхаб! Yтэр түргэн крануудаа хаа, ойлгоо гүш?
Эгээл энэ үедэ, Гэрэлмагай амаашье нээжэ үрдеэдүйдэ, дээдэ дабхарай гэшхүүрhээ hогтуу хүршынь абяан дуулдаба:
- Эй, ерыш-ээ! Ши буруу, доошоо ошоод хараажа байнаш! Манай дээдэхи гэрhээ уhан урдана ха юм!..
Ямбатай эрэ
Цыцыгма Оюна нүхэр басагантаяа уулзаха бүреэ гомдол оруулдаг:
- Айхабтар ехээр эсэнэб. Yдэр бүридѳѳ үдэшын 8 саг болотор ажалдаа хүдэлөөд, гар хүлгүй, арай амиды гэртээ бусажа, үбгэндөө эдеэ шанаха хэрэгтэй. Заабол амтатайгаар ба үдэр бүри шэнээр шанаха ёhотойб. Yсэгэлдэрэй халааhан эдеэ огто эдидэггүй, ехэл ямбатай хүн даа!
Цыцыгма өөрөө тон соморхоноор хооллодог: нэгэ хүсөөг шанаhан мяханай, морхооб, үгэрсэ г.м. огородой эдеэнэй ба ямар нэгэн фруктын байбал, бэшэ юуншье хэрэггүй.
Мүнөөшье хоёр эхэнэрнүүд уулзаад, Цыцыгма дахяад хүндэ хүшэр байдалаа, эсэhэн сусаhанаа хөөрэжэ эхилбэ. Хашарhан Оюна урдаhаань асууба ха:
- Yбгэншни ажалhаа шамhаа урид ерэхэдээ, өөрөө үдэшын хоол шанаха аргагүй юм гү? Заабол шинии ерээд хооллуулхыешни хүлеэхэдээ яанаб? Хүүгэд бэшэ ха юм!
Цыцыгма нүхэр басаган тээшээ хилайжа хараад:
- Ямар тэнэг асуудал hуранабши? – гэжэ гомдолтойгоор харюусаба. - Гэртээ hайнаар хооллодоггүй эрэ амтатай эдеэтэй ондоо эхэнэрые олоод, тэндэ эдеэлдэг болохол. Би тэрэниие hайн ойлгодог, ухаатай эхэнэр hэн тула бэеэ хайрлангүй оролдоно ха юмбиб.
Баярма БАТОРОВА.
