Согто-Хангилай столоводо болоһон нэгэ ушар.
Столовые даагша шанга, ажалһаа табан минута үлѳѳл һааш, премииешни хаһаха. Ажалшад бултадаа гэр бүлэдѳѳ үхэр малтай, үри хүүгэдтэй, эртэ үглѳѳнһѳѳ үдэшэ болотор олон хүн зониие эдеэлүүлхэ ундалуулха, шанаха шараха, тухашарха, арилгаха угааха. Бууза, бууза… гээд лэ захил орожол байха, үрдижэ ядан хангажал байхаш...
Нэгэ дахин үнѳѳхил Нюра абгай раздачада байгаад лэ, «Түргѳѳр, түргѳѳр бууза асарыт!» гэжэл байна ха. Теэд асардаг Мандал абгай буузын жэгнүүр бариһан, газааһаа орожо ябана ха.
- Яажа ябанаш? Газааһаа хаанаһаа ерэбэш? – гэбэ ха Нюра абгай.
Үймѳѳн, һабандаан, сүлѳѳгүй тухашараан соо Мандал абгайн тархинь эрьеэ юм гү – яараад лэ гүйхэдѳѳ, жэгнүүртэеэ буруу үүдээр газаашаа гарашоод байгаа. Гэнтэ хара газар харажархёод ойлгожо, һѳѳргѳѳ ороо ха.
Энэ мэтээр лэ элдэб янзаар үдэр хоногууд һубарин үнгэрѳѳ. Абгайнарнай ниитын ажалда үнэн сэхээр хүдэлһѳѳр лэ, хүндэтэ амаралтада гаранхайнууд. Мүнѳѳ тэдэнэр наяад наһанай бооридо ябанад. Үри хүүгэдэйнгээ гарыень ганзагада хүргѳѳд, аша зээнэрээ хаража, хамһалсажа, элүүр мэндэнүүд, хошон зугаатай зандаа хүхилдэжэ ябаһаар. Мүнѳѳшье мэнэ-мэнэ уулзажа, зугаалжа, Согто-Хангилайнгаа столоводо хүдэлһэнѳѳ һанан, дурсан энеэлдэдэг. «Эхэнэр хүн эдеэгээрээ буян олодог» гэһэн буряадай сэсэн үгэ тон лэ зүб ха даа.
