Олоной аба, урдаа хараха ахай
   Гэрэй эзэн Даши-Дондок Сагаан-Шулуутай нютагта Даба-Нима Раднаев Цыпелма Дашиева хоёрой бүлэдэ 5 хүүгэдэй ехэнь боложо, 1981 ондо түрэһэн юм. Нютагайнгаа дунда һургуули дүүргээд, Благовещенскын багшанарай колледждо һуража, физическэ культурын багша мэргэжэлтэй гараһан. Түрэл һургуулидаа тамирай багшаар, бүхэ барилдаанай һоригшоор хүдэлөө. Һүүлээрнь Улаан-Үдын харгын ба барилгын «Икат-Плюс» компанида машинистээр ажаллаһан байна. Тэндэ наһанайнгаа нүхэр Саран басагантай танилсажа, инаг дуранай охиндо абтажа, гэр бүлэ болоо һэн. Залуу бүлэ Сагаан-Шулуутай ерэжэ түбхинөө. Мүнөө тэдэ угаа дамжуулха, нэрээ нэрлүүлхэ 4 хүбүүдые, хоёр дангина басагадые хүмүүжүүлнэ. Гэрэй эзэн сүлөө сагтаа эбэр номоор харбаха дуратай, мүрысөөнүүдтэшье хабаададаг.
   Даши-Дондок Раднаевтанай бүлэ газаагаа тахяа, 2 даага, 1 азарга баридаг. Нютагһаа 20 гаран модоной зайда Булдируута гэжэ газарта үмсын хүдөө буусатай. Тэндэ 50-яад үхэртэй ба адуун һүрэгтэй, 20-ёод хони ямаа үдхэдэг. Туһалагшатай байһан, мүнөө малаа өөһэдөө харана. Гэрэй эзэн нютагайнгаа түймэр саралгын частьда жолоошоноор хүдэлдэг.

You have no rights to post comments