Могойто нютагайхид хэр зэргэ буряад номуудые уншана гээшэб гэhэн асуудалда харюу үгэхыень Н.Очировай нэрэмжэтэ номой сангай нютаг ороноо шэнжэлэлгын ба үндэhэн литературын таhагые даагша Дарима Дашиевада Шэнэ жэлэй урдахана хандаһан байнабди.
Номой санда олон жэлэй туршада аша үрэтэйгөөр ажаллажа ябаhан Дарима Анандаевна дэлгэрэнгыгээр иигэжэ хөөрөө: «2016 ондо манай таһагта 600 хүн ерэжэ, тэдээндэ нютаг ороноо шэнжэлэлгын 11700 ном, хэблэлэй толилолгонууд, тэрэ тоодо буряад хэлэн дээрэ 1500 зохёол үгтэһэн байна (книговыдача). Могойто hууринай залуушуул жэлэй хугасаа соо оройдоол 81 буряад ном абажа уншаа. Тиигэбэшье һүүлэй жэлнүүдтэ буряадаар уншаха дуратайшуул олон боложо байна.
Энэ таhагта Забайкалиин хизаарта, Агын тойрогто, Могойтын аймагта болон хүдөө нютагуудта зорюулагдаhан зохёолнууд бии. Тиихэдэ Буряад орон тухай номууд байха. Могойтын станцида анханhаа ород зоной ажаһууһан тула манай номой санда урданай буряад уран зохёол байхагүй, харин 1980 гаран онуудhаа хойшо түрэлхи хэлэн дээрэ барлагдаhан номуудтайбди. Могойтын аймагай түбэй номой санда ажаллаhан Валентина Гармаева тус таhаг байгуулгын ажал 2003 ондо эхилhэн. Мүнөөнэй уншагшад буряад түүхэ домогоор, ёhо заншалаар, уран шүлэгөөр hонирхожо, Сагаалган, даага дэллээн, hээр шаалга, үhэ хайшалалга тухай гэхэ мэтэ толилолгонуудые, түрэл нютагаа шэнжэлэлгын номуудые һурадаг. Илангаяа hургуулиин hурагшад, багшанар, соёлшод арадай һайндэр, буряад хэлэнэй конкурс, эрдэмэй конференцинүүдые үнгэргэхэдөө, аймагай номой сан ерэжэ, удхатай, hонин номуудые, бүгэдэ буряадай «Толон» газетэ ехэ hайнаар уншадаг. Мүнгэнэй шахардуу байдалhаа «Буряад үнэн» газетэ захидаггүйбди. Тиимэһээ дэлгэрэнгы, тодорхой баримтануудтай «Толон» газетэ тон шухала, туhатай хэблэл болодог. Би «Толоной» хуудаhануудые hэхэжэ, өөртөө хэрэгтэй тэмдэглэл, зураглал, статьянуудые хайшалжа абаад, «Дурасхаалта газарнууд», «Арадай дуушан Лхасаран Линховоин» гэхэ мэтэ олон хабтаһанууд соо хадагалдагби. Эдэ толилолгонууд хүн зондо тон туһатай, хэрэгтэй байдаг. Тиихэдэ «Забайкальский рабочий», «Агинская правда», «Местное время» газетэнүүдтэ захил хэдэгбди».
Дэлгэрэнгыгээр 4-дэхи дугаарта.
