Эдир артистнар бэлэн бэшэ дүрэнүүдые үндэр хэмжээндэ наадажа, ахашуул болон багшанартай зэргэ тайзан дээрэ шадабарияа харуулжа ябадаг. Дүршэлтэй хүтэлбэрилэгшэд ургажа байгаа залуу үетэниие соёлой талаар hургажа, холо ойгуур суурхуулжа, бэлиг шадабарииень үеын үедэ хүгжѳѳжэ байдаг. «Тэршээхэн унаган» 2012 ондо байгуулагдаһан сагһаа хойшо аймагай, тойрогой, хизаарай конкурснуудта хабаадажа, оло дахин амжалта туйлажа, нэрэеэ дээгүүр нэрлүүлдэг гээшэ.
Агын Буряадай автономито тойрогой соёлой габьяата хүдэлмэрилэгшэ Цынжидма Цырендашиева аман зохёолой таһаг байгуулһан байна. Түрүүшын жэлдэ 15 һурагшад һураһан. Тус таһагта эдир һурагшад 4 жэл һурана. Һурахадаа, «арадай аман зохёол», «фольклорно ансамбль», «хүгжэмэй зэмсэгүүд», «фольклорно хореографи» шудална. «Тэршээхэн унаган» бүлгэмэйхид һургуулидаа, нютагтаа болоһон, гадууршье үнгэргэгдэһэн хэмжээ ябуулгануудта оло дахин хабаадаһан байна. Жэшээлхэдэ, Ножын нуурта хун шубуудай угтамжада, Ага найман эсэгын комплексын Хии Мориной хүшөө нээлгэдэ, Буряад хэлэнэй һарын хэмжээ ябуулгануудта хүбүүд, басагад заабол хабаададаг гээшэ. Амжалта илалтануудыень тоолоходо, «На Байкале» гэһэн Бүхэроссиин хүүгэдэй аман зохёолой конкурсдо хабаадажа, лауреадууд боложо, нэгэдэхи шатын дипломдо хүртэһэн байна. Удаань Томск хотодо үнгэргэгдэһэн «Вместе мы - Россия» гэһэн арадай Бүхэроссиин уран һайханай фестивальда хабаадаһан. Тойрогой соёлшодой бүлэгтэ оролсожо, бүлгэмэй гэшүүд Улаан-Үдэ хотодо ажаһуудаг Агын тойрогһоо уг гарбалтай нютагайхидаа Сагаалганаар амаршалжа, концерт-наада харуулһан байнад. «Тэршээхэн унаган» бүлгэмэй 13 үхибүүд багшанартаяа Монголой «Найрамдал» гэһэн уласхоорондын фестивальда хабаадажа, алтан медальда, сертификадта хүртэһэн габьяатай. Бүлгэмэйхидтэ гэртээ байха сүлөө забда гараагүй. Улаан-Үдэ хотодо «Четыре согласия» гэһэн олон нютагуудай хүүгэдэй аман зохёолой бүлгэмүүдэй хоорондын конкурсдо хабаадажа, нэгэдэхи шатын дипломдо хүртэһэн байнад. Удаань «Гуранёнок-2015» гэһэн уласхоорондын фестивальда «Мода» янзада арһа элдэжэ, костюмуудые оёхо тухай түлэб-лэл бэелүүлээ. Бүгэдэ буряадай «Алтаргана-2016» фестивальда «Тэршээхэн унаган» бүлгэм «Энхэ дайдаяа гамнаһан эрьмэгтэй гутал» гэһэн зүжэг табижа, фольклорно коллективүүдэй дунда түрүүшын һуури эзэлһэн байха юм. Агада 2012 ондо үнгэргэгдэһэн «Алтарганада» бүлгэмэй гэшүүд Хүнхэр нютагай бэлигтэй модельер Лариса Раднаевагай оёһон хубсаһануудые харуулжа, гран-прида хүртөө бэлэй. Багшанар Ц.Цырендашиева, Ж.Базаргуруев зүжэгүүдые табижа, хүүгэдтэеэ Сагаалганай, Шэнэ жэлэй наадануудые шэмэглэдэг.
