Нэн түрүүн, Агын Буряадай тойрогой Захиргаанай хүтэлбэрилэгшэ Буянто Батомункуев врачуудта, эмнэлгын сестрануудта, дезинфекторнүүдтэ, жолоошодто хандажа, эгээл энэ үдэр - Россиин Гүрэнэй тугай үдэр таанадтаа баярай үгэнүүдые дамжуулжа байһамнай гүн удхатай гэжэ тэмдэглээ.
- Коронавирустай ушараагүй нютаг орон Росси соо үгы, Агын тойрогтошье мүнөө 500-гаад хүн үбдөөд байна, 6 хүн наһан болоо. Иимэ бэлэгүй сагта ажаһуугшадай энхэ элүүрые сахижа байһан таанадай ажал сэгнэшэгүй ехэ. Могойтын аймагай больница моностационар болгогдоод, 2 һарын туршада COVID үбшэнтэниие абажа байгаа. Агын больницын лаборатори һаадгүй ажаллаа. Булта ажалаа тон һайнаар, үнэн сэхээр хэһэнэйтнай түлөө бүхы нютагайхидайнгаа, тойрогой Захиргаанай, хизаарай засаг газарай зүгһөө баярые хүргэнэб. Энээнһээ урагша эд зөөри үлүү ехээр сэгнэдэг, ямар нэгэн артистнарые, тамиршадые шүтөөн болгожо байһан һаа, мүнөө тон ехээр хүндэлхэ зомнай, бодото баатарнууднай эмшэд болоно гэжэ хүн зомнай ойлгоо ёһотой. Арад зонойнгоо энхэ элүүрэй түлөө ябадаг таанадтаа энхэ элүүрые хүсэе, - гэжэ амаршалаад, Буянто Балданжапович 14 хүндэ тойрогой Захиргаанай баярай бэшэгүүдые барюулаа.
Бүхыдөө «Амар сайн» театрай артистнарай концерт нааданда эмнэлгын һалбарида ажалладаг 40 гаран хүн уригдаһан байна. Киноконцертнэ танхим соо коронавирус үбшэн һэргылэмжын гуримуудые сахижа, эмшэд бэе бэеһээ 1,5 метрэй зайда һуулгагдаа. Тиимэһээ харагшадай альга ташалгашье намдуу байба. Намдуу аалин байдалдашье һаа, артистнар яб гэмэ наада харуулжа, хүндэтэ эмнэлгын хүдэлмэрилэгшэдэй сэдьхэл хужарлуулаа бшуу.
