Зургаан жэл соо фестиваль нютаг можонууд хоорондын хэмжээнһээ уласхоорондын зэргэтэй болоо. Заншалта хэмжээ ябуулгада Үбэр Байгалай хизаарай нютагуудһаа, Буряад Уласһаа, Монголһоо хамта хэдэн мянгаад хүн, тэдэнэй тоодо Хитадһаа аяншалагшад ерээ бшуу. «Кочевник» этнокомплексдо хизаарай, тойрогой мэдээжэ артистнарай, арадайнгаа заншалта хубсаһатай хүнүүдэй олоор ерэжэ, наадажа, хабаадажа, ёохор хатаржа байхыень харахада ямар гоёб! Элдэб сэдэбүүдтэ зорюулагдаһан мастер-классууд харуулагдаа, һур харбалгаар, һээр шаалгаар, шагай наадаар мүрысөөнүүд үнгэргэгдөө.
   Фестивалиин хэмжээндэ «Бренд Забайкалья как драйвер развития туризма» гэһэн «түхэреэн шэрээ» эмхидхэгдэжэ, олзын хэрэг эрхилэгшэд аяншалга хүг-жөөхэ тухай сэдэбээр хөөрэлдөө эмхидхээ.
   Агын Буряадай тойрогой эгээл эдэбхитэй, урагшаа һанаатай залуушуул сэрэгэй тусхай үйлэ хэрэгтэ хабаадажа ябаһан сэрэгшэдые дэмжэхэ талаар акци ябуулаа. Мэдээжэ Агын блогер Андрей Болотов фестивальда ерэһэн зоной дунда лотерей наада эмхидхээ. Һүдэнтэ нютагай Билигма Дашидондокова билет шүүжэ, «Lexus RX-350» авто-унаада хүртөө юм. Тиихэдэ сувенирнэ бүтээлнүүдэй, эдеэ хоолой наймаанууд хүдэлөө, арадай үндэһэн хубсаһа харалгын мүрысөөн болоо.

You have no rights to post comments