Агын соёлой байшан соо мартын 10-да «Сагаан һарын хатан» конкурс эмхидхэгдээ. Конкурс Агын тойрогой байгуулагдаһаар 80, хизаарай буряад соёл хүгжѳѳлгын түбэй байгуулагдаһаар 50 жэлнүүдэй ойн баярай хэмжээндэ үнгэргэгдэбэ.
Соёлой энэ хэмжээ ябуулгада долоон хатад хабаадажа, дуулаха, хатарха, заншалаа мэдэхэ г.м. шадабаринуудаараа мүрысѳѳ. Тиин гол шанда - гран- прида 35 наһатай Ушарбайн басаган, Могойтын аймагай соёлой байшанда залуушуулай политикаар мэргэжэлтэнээр хүдэлдэг Дашима Бадмаева хүртэһэн байна.
Д.Бадмаева.
Нютаг нютагһаа сугларһан долоон хатад хэд бэ гэбэл, соёлшод - «ДалиТЭ» театрай артист, 35-тай Дашима Цынгуева, Агын аймагай соёлой байшанай мэргэжэлтэн, 35-тай Баирма Бороева ба Могойтын аймагай соёлой байшанай мэргэжэлтэн, 35 наһатай Дашима Бадмаева; багшанар – Дулдаргын дунда һургуулинуудай эхин шатын ангинуудай багшанар, 36-тай Оюна Моритуева ба 37-той Сэсэг Тумурова, Ага-Хангилай һургуулиин ород хэлэнэй багша, 37-той Людмила Буянтуева. Мүн 35-тай, Зүдхэлиингѳѳ «Родина» үүлтэртэ заводто малшанаар хүдэлдэг Аягма Анчикдоржиева арга шадабарияа харуулаа.
Тэдэнэр конкурсын «Ѳѳртэеэ танилсуулга» янзада ѳѳр тухайгаа хѳѳрэхэдѳѳ, омогоо нэрлээ, хэдэн үе угаа тоолоо, гэр бүлэтэеэ танилсуулаа, слайд дурадхаа. Мүн «Сэдьхэлэйм аялга» гэһэн дуунай мүрысѳѳндэ хатан басагад хоолойнгоо хонгёое гэршэлэн, «Басаганай дуун», «Эжыдээ», «Улаалзай», «Жаргалтай зүрхэн» г.м. буряад дуунуудые дуулабад. Сэсэг Тумурова конкурсын энэ янзада хүгжэмшэн Баир Дамдинжаповай хүгжэмтэй «Аба эжыгээ гамнаарай» гэһэн ѳѳрынгѳѳ дуу зэдэлүүлээ юм. Бултанда мэдээжэ болоһон дуушан Дашима Цынгуева хэзээшье гоё гэгшээр дуулаба.
Дэлгэрэнгыгээр 11-дэхи дугаарта.
